Времето за одмори и патувања се ближи, па британската агенција „Бонд рис“ реши да сподели некои важни совети, повикувајќи ги туристите да бидат внимателни, дури и кога престојуваат во хотел, бидејќи крадците секогаш демнат, а патувањето носи одредени ризици.
Завесите на прозорците во хотелските соби треба да бидат спуштени бидејќи не сакате да го „рекламирате“ вашиот имот пред крадците што демнат во сенка. Ова се однесува на собите што не се заштитени од љубопитните погледи (кога собите гледаат кон други соби во хотелот или надвор од него), а особено на пониските катови. Во исто време, ако не се чувствувате безбедно откако ви е дадена соба на одреден кат, треба да побарате да ве преместат. По можност помеѓу третиот и петтиот кат каде што е најбезбедно.
– Туристите можат да бидат изложени на ризик од кражба, особено ако безбедноста на хотелот не е добра – се вели во извештајот на агенцијата.
Спуштените завеси спречуваат љубопитните очи да знаат кога влегувате и кога излегувате од хотелската соба. Експертите истакнуваат дека никогаш не треба јавно да зборувате за вашите планови за тоа каде ќе се движите, особено не со гласен тон. Туристите во приватно сместување треба да проверат и дали има скриени камери во собите. Скриените камери можат да бидат многу мали и поставени каде било во собата.
