Практикувајте некои секојдневни активности кои имаат моќ да му се спротивстават на стресот и да го подобрат вашето расположение, пишува „Сајколоџи тудеј“.
Не е потребна дијагноза за ментална состојба или болест, за едно лице да почувствува низа од непријатни емоции. Нормалната човечка состојба значи дека секојдневно сме пред предизвици, под стрес и имаме подеми и падови. Една од карактеристиките на луѓето кои успешно се справуваат со овие предизвици е тоа што тие рутински управуваат со нив, користејќи секојдневни активности за кои е познато дека се спротивставуваат на стресот. Очигледно, постојат многу различни стратегии за справување со притисоци и промовирање на здравјето, кои ни помагаат да управуваме со нашите емоции и да донесуваме обмислени одлуки за проблемите во нашите животи. Она што го нудиме овде се три едноставни активности за да се чувствувате подобро во моментов -сега веднаш – без разлика дали сте под стрес, досадно ви е, вознемирени сте или се чувствувате заглавени во бездна.
Прошетајте: За вашето физичко и ментално здравје, нема ништо толку моќно како што е една едноставна прошетка. Чинот на чекорење ја зголемува количината на кислород што циркулира во вашиот крвоток, што е поврзано со подобрување на голем број физички и когнитивни процеси, а самото чекорење го стимулира и ослободувањето на ендорфини (хормони кои промовираат чувство на благосостојба).
Ако сакате да го надополните квалитетот на прошетката, направете го тоа надвор во природен амбиент како што е плажа, парк или пешачка патека. Иако секоја прошетка е добра, пешачењето и свежиот воздух во исто време се одлична комбинација. Дишењето на свеж воздух е поефикасно за зголемувањето на нивото на кислород во крвта отколку дишењето во затворен простор со циркулирачки воздух. Чекорењето во природен амбиент го намалува кортизолот кога сте под стрес, го подобрува расположението, го зајакнува имунолошкиот одговор, ги зголемува енергијата и веројатноста дека ќе ја повторите активноста.
Во случај, пак, да сакате да пешачите на повисоко ниво, одете со куче или пријател. И двете варијанти ќе ги олеснат вашите позитивни социјални интеракции, како и вашата социјална поврзаност и расположение. О, да – исклучете го телефонот и оставете го да лежи во џебот.
Згответе нешто сосема ново во кујната: Чинот на креирање и можноста да го видите и уживате во вашиот готов производ е моќен противотров за стресот и промовира чувство на успех и благосостојба. Готвењето храна од почеток до крај и можноста да уживате во тоа, создава синџир на позитивно зајакнување и чувство на самопочит. За да ги максимизирате ефектите, споделете ја храната со други и искусете ги придобивките од социјалната поврзаност и чувствата на благодарност.
Спуштете го телефонот и тргнете се подалеку од компјутерот/таблетот: Фактот што сме постојано достапни и поврзани преку нашите уреди прави да реагираме ненормално на понекогаш преголемите стимули произведени од нашите телефони и останатата електроника. И прекумерното време пред ТВ – екранот е поврзано со голем број психолошки и физички проблеми. Поточно, се покажа дека премногу гледање телевизија време носи значителен ризик за нас во форма на депресија, полоша општа благосостојба, нарушување на спиењето, болки во вратот, проблеми со видот, лоша форма на телото и намалена физичка активност. Самоограничувањето на времето поминато пред екранот може да ги негира гореспоменатите проблеми и да овозможи зголемени физички активности, кои имаат и физички и ментални здравствени придобивки. Освен тоа, кога не сте заробени пред телевизорот, тоа ги зголемува вашите можности за директна социјализација.
Ова се само три работи кои можат да донесат добри промени во однос на тоа како се чувствувате во моментов и колку сте добро подготвени да се справите со стапиците на животот. Затоа, престанете да ја читате оваа објава и замолчете го телефонот, направете си домашна закуска, земете го кучето и излезете надвор на прошетка. Ќе ви биде мило што го направивте тоа.
Сепак, да напоменеме – имајте предвид дека ова се совети наменети за нашите вообичаени секојдневни предизвици и, иако некои може да бидат компоненти на планот за третман на менталното здравје, тие не се наменети како самостојни и не треба да се сметаат како замена за третманот кај оние на кои им треба професионална грижа за менталното здравје. Секогаш барајте совет од психолог или психијатар, доколку чувствувате дека ви е потребен.
