ВИП-забави и злоупотреби
Украинската манекенка Марија Ковалчук (20) беше пронајдена претепана и едвај жива покрај пат во Дубаи минатиот месец. Таа исчезна 10 дена претходно, откако прифати покана да оди на „ексклузивен настан“. Мажите што ѝ пристапиле со понуда тврделе дека работат во светот на манекенството. Кога била пронајдена, таа немала мобилен телефон, пасош или друг документ, едвај преживеала по четири итни операции… Овој случај е само дел од темните тајни што ги крие Дубаи, пишува „Њуз ком.ау“. Адвокатот на Марија тврди дека таа била на забава со локални шеици. Сепак, полицијата соопшти дека нејзините повреди се резултат на пад и дека не се поднесени обвиненија. Случајот фрли светлина врз темната страна на Дубаи, за што долго време се шепоти, но ретко се зборува отворено – тајниот свет на ВИП-забавите.
Преку социјалните медиуми, организаторите на овие настани стапуваат во контакт со странски жени, ги довезуваат со авион, великодушно ги носат на шопинг во бутици од најпознатите и најскапите брендови во светот и им плаќаат да бидат гости на ВИП-забави. Откако ќе влезат во луксузни хотели или јахти, тие стануваат жртви на најтемните нагони на супербогатите мажи, чиј степен на изопаченост варира. Тоа е во остра спротивност со дотераната слика за гламур што владата на Обединетите Арапски Емирати се обидува да му ја прикаже на светот.
Амбициозните инфлуенсери, кои имаат долгови или минимални спонзорства, се особено ранливи на вакви понуди. Оваа група жени се клучни за претставување на Дубаи на социјалните медиуми. Владата на Емиратите инвестира многу во својата титула како светска престолнина на влијателните личности. Им плаќа на многу креатори за промоција и лесно им издава визи за работа од далечина за да го модернизира својот имиџ. Сепак, под тој сјај лежи валкана реалност. Намамени од лажни ветувања за забави за одредена цена, жените што прифаќаат ВИП-покани честопати се наоѓаат фатени во ужасна мрежа на сексуална експлоатација. И покрај фактот дека секс-индустријата во Дубаи цвета во сенка, проституцијата таму е нелегална. Доколку бидат осудени, сексуалните работници се соочуваат со шест месеци затвор. Бидејќи ВИП-зделките се склучуваат преку интернет, тие спаѓаат во правна сива зона, која е слабо регулирана, но ризикот е реален. Прекршителите се соочуваат со строги казни, вклучувајќи затворска казна и депортација. Доколку работниците бидат фатени без важечка виза, тие се соочуваат и со парична казна за нелегална работа.
Истакнатата адвокатка и активистка за човекови права од ОАЕ, Рада Стирлинг, вели дека приказната на Марија не е изолиран случај.
– Повеќето од приказните никогаш не излегуваат на виделина. Постои организиран обид да се прикрие злоупотребата и да се прикаже Дубаи како совршено безбеден град – забележува таа.
Стирлинг, која пораснала во Мелбурн и живее во Лондон, ја советува австралиската влада за прашања поврзани со политиката кон Обединетите Арапски Емирати и неодамна зборуваше на оваа тема пред Обединетите нации.
– Жените што одат таму треба да бидат свесни за својата ранливост. Злоупотребата е широко распространета. Жените се незаштитени, а пријавувањето во полиција или поднесувањето жалба може да доведе до нивно апсење – предупредува таа.
