Милиони жени што страдаат од потешка форма на предменструален синдром (ПМС) имаат значително поголем ризик од потенцијален фатален мозочен удар, според неодамна објавената голема шведска студија. Иако повеќето жени доживуваат, барем повремено, ПМС што предизвикува непријатни физички и емоционални симптоми во неделите пред менструацијата, околу една третина од жените може да имаат потешка форма што бара третман.
Сега, шведските истражувачи открија дека жените со дијагностициран ПМС имаат вкупно 10 проценти поголем ризик од кардиоваскуларни заболувања во споредба со жените без такви дијагноза. Кога кардиоваскуларните заболувања беа разгледани поединечно, беше откриено дека овие жени имаат 27 проценти поголем ризик од мозочен удар и 31 процент поголем ризик од развој на аритмија. Аритмијата е потенцијално сериозен проблем со срцевиот ритам – може да биде премногу бавен, премногу брз или неправилен – што го зголемува ризикот од срцев удар.
Во студијата, експертите од институтот „Каролинска“ во Стокхолм ги анализираа здравствените податоци на речиси 100.000 жени дијагностицирани со ПМС во текот на 22 години. Тие ги споредија дијагнозите за мозочен удар и аритмија со општата популација и со сестрите на оние жени што немаа ПМС. И покрај тоа што беа земени предвид други фактори на ризик од срцеви заболувања, како што се дебелината и пушењето, врската помеѓу ПМС и зголемениот ризик остана. Ризикот беше особено изразен кај жените што беа дијагностицирани со ПМС пред 25-годишна возраст, како и кај оние што претходно доживеале постпартална депресија – исто така состојба што може да биде предизвикана од хормонални промени. Научниците сè уште не знаат точно зошто ПМС го зголемува ризикот од кардиоваскуларни проблеми.
Една хипотеза е дека хормоналните флуктуации можат да ги нарушат системите на телото што го регулираат крвниот притисок, да го зголемат воспалението или да влијаат на начинот на кој телото ја претвора храната во енергија.
