Жртва на сопствената стратегија
Во 1990-тите години „Барбери“ беше олицетворение на луксузната британска мода, а со познатиот кариран дезен означуваше богатство и добар стил. Но денес носењето облека на „Барбери“ значи нешто друго… По децении поминати обидувајќи се да го врати бизнисот на истото ниво, напорите на британскиот производител да напредува како врвен играч во категоријата луксуз и понатаму пропаѓаат.
Во средината на овој месец брендот пријави значителен пад на добивката пред оданочување за фискалната година, која заврши на 30 март 2024 година, од 745 милиони евра на 450 милиони евра, а вкупните приходи паднаа за четири отсто. Акциите на компанијата паднаа за 57 отсто во минатата година и сега се тргуваат на најниско ниво од 2016 година, зголемувајќи го притисокот врз извршниот директор Џонатан Акеројд и креативниот директор Даниел Ли да го постигнат долгоочекуваниот пресврт. „Барбери“ е само една од неколкуте компании погодени од падот на побарувачката за луксузни стоки поради штедливиот пазар по пандемијата. Така, Керинг, сопственикот на „Гучи“, неодамна алармираше поради слабата продажба, иако „Ерме“ излезе од пандемијата релативно неповреден.
Проблемите на „Барбери“ делумно се резултат на построгата состојба на луксузниот пазар: инфлацијата и забавувањето на економскиот раст го зедоа својот данок, особено кај кинеските купувачи. Но „Барбери“ исто така самиот си направи штета: откако постигна огромно признание за името и бизнис вреден 3,8 милијарди долари годишно во 2000-тите и раните 2010-ти – со стратегија заснована на лесно сварлива интерпретација на британскиот идентитет и позиционирање на цените што се протегаше на линијата помеѓу високите луксузни куќи и врвни брендови како „Поло Ралф Лорен“ – тој беше заглавен во една деценија стагнација поради неуспехот на неговата стратегија за промоција на луксуз. Покрај тоа, влијаеја и пропаѓањето на стоковните куќи во САД и зголемените трошоци за производство на висококвалитетни производи. Сето тоа во комбинација од слабата употреба на социјалните мрежи за реклама, како и слабите повратни информации за новата колекција на „Барбери“, не дава причина да се верува дека брендот ќе се врати на својот трон.
