– Успеавме да постигнеме меко слетување на Месечината. Индија е на Месечината“, потврди Сридара Паникер Соманат, шеф на Индиската организација за вселенско истражување (ИСРО), откако сондата Викрам слета на јужниот пол на Месечината.
Претходно во контролната соба на мисијата имаше ерупција на воодушевување кога беше објавено дека сондата слетала „безбедно и нежно“.
Индиското вселенско летало „Чандрајаан-3“ денес ја спушти сондата „Викрам“ на јужниот пол на Месечината, што го означи првиот пат кога било кое вселенско летало слетало на локацијата.
Претходниот обид на индиската вселенска програма да испрати вселенско летало на Месечината не успеа во 2019 година, а мисијата Чандрајаан-3 доаѓа само неколку дена откако руското вселенско летало Луна-25, првото во речиси 50 години што ја изврши истата мисија, се урна на површината на Месечината – пренесе „Гардијан“.
Само три земји претходно слетаа на Месечината
Сондата односно лендерот Викрам, што на санскрит значи храброст, се одвои од погонскиот модул минатата недела и оттогаш испрати фотографии од површината на Месечината по влегувањето во орбитата на Месечината.
Во 2014 година, Индија стана првата азиска земја што стави сателит во орбитата околу Марс и треба да лансира мисија со екипаж во орбитата на Земјата во следните неколку години, почнувајќи со тест летови без екипаж во 2024 година.
Само Русија, САД и Кина, пред Индија, претходно постигнаа контролирано слетување на површината на Месечината, потсетува „Танјуг“.
