Просторот во градовите станува сè поважен и се очекува дека поголемиот дел од светското население ќе живее во урбани области во следните неколку децении. Кога станува збор за урбанистичкото планирање, сѐ помалку има можност за обиди и грешки. Одлуките донесени денес ќе имаат значително влијание врз иднината. Но што ако постоела можност за тестирање и анализа пред градежните потфати? Ова е суштината на дигиталните копии на градовите низ светот, кои ги имаат Шангај, Њујорк, Сингапур и Хелсинки.
Андерс Лог, професор по пресметковна математика и директор на Центарот за дигитални реплики на градовите на технолошкиот универзитет „Чалмерс“ во Шведска, нагласи дека дигиталните реплики ги подобруваат традиционалните тридимензионални модели на градовите. Репликите се напојуваат со податоци во реално време и вештачка интелигенција. Ова овозможува да се симулира сè – од инфраструктура, преку изградба до сообраќај и потрошувачка на енергија.
Примерот за градот Чатануга
Американскиот град Чатануга има 180.000 жители и се наоѓа во подножјето на Апалачките Планини. Речиси е еднакво оддалечен од Атланта (Џорџија) на југ и Нешвил (Тенеси) на север. Кевин Комсток, консултант на компанијата „КЦИ текнолоџис“ и поранешен директор на проектот за паметен град Чатануга, истакна дека дигиталната реплика на овој град е добар пример за реплика. Градските власти и други, вклучувајќи ги и националната лабораторија „Оук Риџ“ и Универзитетот во Тенеси, работеа на репликата. Како што објаснува Комсток, фокусот на првата реплика на овој град, наречена ЦТвин, е фокусирана на една од главните сообраќајници во градот за да се испита потрошувачката на енергија во сообраќајот. Во моментов се следи движењето на пешаците и моторните возила за да се подобри безбедноста во сообраќајот на крстосниците.
Доцентот на холандскиот универзитет „Твенте“, Вил Лехтола, истакна дека дигиталните копии на градовите се можност за правилно планирање на нивниот развој.
Како функционираат дигиталните реплики
Лехтола беше градски советник во финскиот град Еспо, кој се наоѓа во близината на Хелсинки. Како што рече, кога се размислувало за изградба на нова линија на метро, Еспо прво ги дигитализирал плановите и самата градба. Тој истакна дека дигитализацијата дава увид како ќе функционира проектот по неговото спроведување. Како суштински прашања посочи што да се анализира за да се подобри состојбата во градот и како да се предвиди како нешто ќе функционира. Тој посочи дека за анализа се користат дигитализирани, необработени податоци со цел, на пример, како новата зграда ќе реагира на ветерот или земјиштето на кое се планира да се гради. Како пример го наведе Гетеборг.
– Гетеборг е изграден на глина, па затоа е многу важно да се моделира однесувањето на глината. Што ќе се случи ако започнете голем инфраструктурен проект? Дали ќе има потенцијален ризик за време на копањето или при изградбата на тунел – објасни Лехтола.
Тој посочи дека клучот за дигиталните реплики на градовите е честото ажурирање на податоците, во спротивно тие стануваат несоодветни. Според процената за 2021 година на технолошката компанија „АБИ рисрч“, градовите ќе заштедат 280 милијарди долари до 2030 година со користење дигитални копии за урбанистичко планирање. Според извештајот на консултантската компанија „ПвЦ“, дигиталните реплики ќе помогнат во одржливиот развој, што е суштината на паметните градови.
Податоци за иднината
Лехтола истакна дека има сѐ повеќе извори на податоци за дигитални реплики – самоуправувачки автомобили, дронови, градежна опрема со сензори. Колку повеќе технолошки можности има, толку повеќе предизвици има во собирањето, складирањето и заштитата на податоците.
Меѓутоа, како што забележа Лехтола, ова се предизвици на кои се навикнати програмерите и истражувачите. Тој повтори дека тоа се податоците врз основа на кои ќе се планира иднината на градовите. Затоа тој очекува дигиталните копии на градовите да бидат „насекаде“, пренесува „Си-ен-ен“.
