Рони Абергел, новинар и активист за човекови права со потекло од Данска, добил неверојатна идеја да основа несекојдневна библиотека во која наместо книги ќе се „позајмуваат“ луѓе кои ќе ги раскажуваат нивните приказни. Идејата на Абергел се родила откако негов близок пријател преживеал напад со нож во Копенхаген, по што Човековата библиотека започнала да работи во 2000 година и оттогаш „изградила многу мостови“.
Во Човековата библиотека, наместо полици со книги, има луѓе кои се „позајмувани“ на 30 минути. Со раскажување на нивните приказни и одговарање на љубопитните прашања на посетителите, Абергел се надевал дека посетителите ќе ги прошират своите видици и оти нивните сфаќања ќе бидат променети. Во библиотеката честопати се среќаваат луѓе со спротивставени ставови или различни сфаќања, со што преку разговор успеваат да ги споделат нивните мислења и да се доближат едни до други.
– Верував дека идејата ќе профункционира бидејќи библиотеката е едно од ретките места во нашата заедница каде што сите се добредојдени, без разлика дали се богати или сиромашни, бездомници или живеат во замок, дали се професори или неписмени – вели основачот.
Неговата идеја се проширила како што се шират информациите за напишан бестселер. Од нејзиното основање, Човековата библиотека одржала сесии во над 80 земји, во музеи, библиотеки, на фестивали и во училишта. Библиотеката содржи над 1.000 човечки книги, кои зборуваат на 50 различни јазици.
– Мислам дека е потребно луѓето да разговараат со оние кои го гледаат светот поинаку од нив, каде што ќе се ослободат од тензијата која понекогаш ја чувствуваат во воздухот – вели тој.
Учесниците понекогаш ги откриваат и најдлабоките тајни за време на 30-минутните сесии, а нивната разноликост е неверојатна. Честопати, разговорите создаваат неочекувано чувство на блискост кај посетителите, кои кимнуваат со главите во знак на согласност или нудат насмевки на охрабрување додека другите ги „прелистуваат страниците“ на нивните животи. Но, не секој може да стане учесник во библиотеката на Абергел, чија професионалност е резултат на обука.
– Нашите „книги“ се проверени и обучени за да разговараат со посетителите. Луѓето кои аплицираат да станат „книги“, но сакаат да се впуштаат во политички дебати, или имаат некакви други агенди не се прифатени во нашата библиотека. Ние сме целосно неутрални, како Швајцарија. Сѐ додека не проповедате омраза или нетолеранција, вие имате потенцијал да станете дел од нашата полица со книги – вели Абергел.
