Тимот на „Џет тест енд транспорт“ е презафатен со преместување на празни авиони низ целиот свет за време на пандемијата. Оваа глобална авиокомпанија вржи услуга за преместување на авионите на барање на клиентите, при што извршува летови со туѓи авиони и само во еден правец, без патници и без товар. Тие се експерти за вакви летови, вршејќи услуги за празни авиони низ целиот свет, пренесува Си-ен-ен.
За време на пандемијата на ковид-19 многу авиокомпании ги приземјија своите авиони, додека коосновачот Стив Џордано и неговите пилоти и партнери се едни од најангажираните луѓе на небото.
Околу половина од светската флота, или над 20.000 комерцијални авиони, се изнајмени на авиокомпаниите. На крајот на повеќегодишниот закуп авиокомпаниите можат да донесат одлуки дали повторно да изнајмат или да ги вратат авионите на закуподавецот.
Токму за такви видови на деловни активности на авиокомпаниите, потребни се услугите на „Џет тест енд транспорт“.
Лизингот на авиони е деловна активност. Во споредба со изнајмување на недвижнини ако работата на авиокомпанијата се влоши, леталото кое го изнајмила може да се врати и да се испрати до друг оператор. Тоа е мобилно средство.
– Кога авионот ќе се врати на крајот на закупот, ние го транспортираме-преместуваме леталото или до следниот клиент, или во складиштен простор, или во објект за одржување. Тоа е околу половина од нашата работа. А другата половина е изнесување авиони од складишните места или надвор од објект за одржување и транспортирање-преместување до новиот оператор – вели Џордано во разговор за Си-ен-ен.
„Џет тест“ започна со работа во 2006 година, иако Џордано започнал да транспортира авиони неколку години претходно.
Следејќи ги процедурите на една авиокомпанија, „Џет тест“ е регулиран со Бермудски сертификат за оператори на авиони (АОЦ) и е организиран на ист начин како поголем авиопревозник. За своите летови има дури и свој повик за идентификација Џеј-ти-ен.
Всушност, „Џет тест“ функционира исто како мала авиокомпанија, но со една голема разлика – нема ниту еден свој авион.
И не лета само од точката А до точката Б за авион-тест. Како што сугерира неговото име, Џордано и неговиот тим вршат пробни летови со авиони што се враќаат на работа по одржување или модификација, вклучувајќи авиони кои сега функционираат како патнички авиони, за да бидат пренаменети за превоз на товар, за гасење на пожари или намалување на ширењето на излеана нафта.
