Поетско читање, наречено „Смени го невремето“, ќе се одржи в сабота (26 март) во кафулето „Буква“ со почеток во 20:30 часот.
Снежана Стојчевска, Долорес Атанасова – Лори, Биљана Стојановска и Ана Голејшка Џикова се четирите поетеси што ќе го предводат овој настан.
Публиката ќе има можност да чуе и види нивна, но и туѓа поезија.
Снежана Стојчевска е автор на пет поетски книги „Шеќер по подот“ („Или-Или“, 2012), „Под нулата“ (награда „Бели мугри“, 2013), „Модри Фантаазии“ („Темплум“), „Треба да е лесно“ („Антолог“, 2017) и „Ќе се завијам во песни“ („МИ-АН“, 2019). Застапена е во повеќе антологии, панорами и зборници на младата македонска поезија. Член е на Друштвото на писателите на Македонија. Член е на организацискиот одбор на Скопски поетски фестивал, кој за првпат се одржа во септември 2022 година.
Песните на Д.А.Лори за првпат се објавени во „Букбокс“, по што следи соработка со издавачката куќа „Блесок“, за која во 2014, ја издава својата прва збирка поезија насловена ֦„Будење во трето лице еднина“. Во 2016, од печат излегува „Со ветрот под рака“ во издание на издавачката куќа „Антолог“. Во 2019 година излегува нејзината трета книга „Небо во кафез“.
Добитник е на наградата „Тодор Чаловски“ за 2019 година, што го овозможи излегувањето од печат на нејзината четврта книга „Ќе фатит бран”. Во 2020 беше во првите пет номинирани за престижната наградата „Браќа Миладиновци“, која се доделува за најдобра книга на „Струшките вечери на поезијата“. Досега е преведена на германски, англиски, хрватски, италијански, српски и шпански.
Биљана Стојановска во 2015 година ја објави нејзината прва збирка поезија „Зборовите немаат значење“ во издание на „Антолог“. Добитник е на книжевната награда „Тодор Чаловски“ за 2017 година за книгата „Стан што се распаѓа“ (2018, „Галикул“).
Нејзината поезија е преведена на англиски, германски, кинески, полски, српски, словенечки јазик, а застапена е и во повеќе македонски списанија за литература и антологии.
Ана Голејшка Џикова во 2013 година ја издаде својата прва книга „Љубов на улица” („Култура“) . Во 2018 година излезе од печат нејзината втора книга поезија „Напишан дом“ („Антолог“). Објавувана е на неколку портали како дел од книжевните текови, со свои дела и видувања за поезијата. Во мај 2020 година нејзин расказ се најде и во книгата „Карантински приказни – Антологија на изолацијата“, во издание на „ТРИ“. Со свои песни е преведена на српски, турски, германски и англиски, а нејзини песни се најдоа во „Литератур анд критик“, (2020) австриско списание за книжевност и списанието „Мантис“ (2017), кое го објавува Универзитетот „Стенфорд“ во САД.
Покрај поезија, Голејшка Џикова пишува и за деца. Таа беше и основачка на книжевните читања „Астални проекции”, кои ги правеа заедно со Ѓоко Здравески.
