Издавачката куќа „Антолог“ ја објави книгата „Реката“ од Лаура Виноградова, роман за тагата поради загубата на сестринската љубов.
И покрај тоа што живее во благосостојба, животот на Руте го проголтува празнина што станува сè понеподнослива поради спомените од нејзиното детство, копнежот по изгубената сестра, помислите за мајка ѝ во затвор и неспособноста да се отвори пред најблиските, вклучувајќи го и сопругот. Десет години по исчезнувањето на нејзината сестра, таа продолжува да ѝ пишува писма. Низ своите лични бегства и соочувања, таа ја открива реката со нејзиното течение како симбол на вистинска блискост што носи утеха. Реката постепено станува нејзина симболична сестра.
Роман со едноставна, но прецизно осмислена нарација, која ги спојува мноштвото светови на неговата хероина, токму како што реката го дефинира текот на животот и на смртта. Приказната е осмислена како аналогна метафора поставена врз енигмата на едно детство и врз енигмата на надежта за тоа како да се продолжи животот по доживеаната загуба.
Преводот на македонски јазик го направи Дарин Ангеловски.
Лаура Виноградова (1984) е латвиска писателка. Дипломирала бизнис-менаџмент. Почнала да пишува на триесетгодишна возраст. Нејзините први книги се за деца. Потоа објавува две збирки раскази. „Реката“ (2020) е нејзиниот прв роман, кој бил номиниран за годишната латвиска награда за литература, а ја добила и наградата за литература на Европската Унија за 2021 година. Живее во Рига, каде што работи во музеј.
