ЈУБИЛЕЈ ИСПОЛНЕТ СО БОГАТА ТВОРЕЧКА ПРОДУКЦИЈА
Иван Глигоровски e пензиониран новинар на образовната и документарната програма на Македонската телевизија, а денес активен публицист. Неуморно создава, се залага за зачувувањето на македонскиот јазик, македонското творештво, фолклор, за македонската традиција, убавини… И во седмата деценија од својот живот останува посветен на македонското наследство.
Автор е на најмногу емисии и книги (монографии) за водопадите на Беласица, за Меѓународниот семинар за македонски јазик, литература и култура во Охрид, на емисијата „Последниот илинденец“, посветена на Ламбе Мојсовски, носител на последната илинденска пензија во Македонија, сценарист и уредник на училишните емисии на литературен македонски јазик во рамките на образовната програма, известувач од светските славистички конгреси во Краков, Полска (1998), и во Љубљана, Словенија (2003).
Иван Глигоровски годинава одбележува 50 години новинарска и публицистичка дејност, а на 8 декември слави 75 години од животот.
– Израснав со „Колибри“ и со „Нова Македонија“. И денес не поминува ден без овој весник. Го читам од првата до последната страница и можам да кажам дека е вистински учебник. Своевремено бев дописник на „Нова Македонија“. И новинарството ми се виде како одлична професија за мене. Имав желба да работам во телевизија и во МРТ му се посветив на телевизиското новинарство. Низ целата моја кариера си поставив цел да го штитам и промовирам македонскиот јазик – вели Глигоровски.
Следејќи ја денешната состојба со употребата на македонскиот литературен и говорен јазик преку информативните средства, смета дека не ги задоволува критериумите, оние за кои се залагаа врвните македонски лингвисти, научници и универзитетски професори.
– Во тој поглед ги споменувам моите професори и соработници: академик Блаже Конески, Божидар Видоески, Лилјана Минова- Ѓуркова, Трајко Стаматоски, Благоја Корубин, Снежана Велковска, Васил Дрвошанов, Људмил Спасов и многу други компетентни и вредни лингвисти и научни работници. Нивните заложби не се применуваат во практиката. Затоа има големо шаренило на натписи и реклами на туѓи јазици. Ако не се преземат мерки, во иднина не може да се очекува подобрување на заштитата и доследната примена на македонскиот литературен јазик. Отсуствуваат телевизиски и радиоемисии. Ме радува што Ленче Смилевска редовно подготвува емисии на МТВ за македонскиот литературен јазик, а голем придонес има и весникот „Нова Македонија“, особено преку прилозите „Колибри“ и ЛИК. По тој пат очекувам да тргнат и другите јавни информативни гласила – истакнува нашиот соговорник
Иван Глигоровски во ТВ-новинарството поминува 32 години. Тој бил сценарист, уредник и водител на точно 458 телевизиски емисии на теми за народното творештво, природата и здравата храна и, особено, за македонскиот јазик и неговата афирмација.
– Во текот на цели 20 години успеав да ги регистрирам активностите на 20 собирачи и нивните полни торби со народни мудрости и други фолклорни бисери. Не помалку значајни се емисиите „Македонските револуционери опеани во народните песни“, во кои се опеани: Гоце Делчев, Јане Сандански, Јордан Пиперката, Даме Груев, Питу Гули, Ѓорче Петров и Никола Карев. Тука се и ТВ-серијалите: „Мотиви од народните песни“, „Преданија“, „Топоними“, „Македонското народно творештво во соседните земји“ – вели Глигоровски.
Тука се вбројуваат и: „Сто години ’За македонцките работи’“; „Сите досегашни речници“; „Величината на Рацин“; „Преродбениците од Башино Село“; „По корените на Крсте Петков Мисирков“; „Костенцев и Робовското народно училиште“, потоа ТВ-серијата „Првите учители на македонски јазик 1943-1948 г.“.
– Успеав да соберам многу важни историски податоци и архивски материјали, кои оставаат трајни траги за македонското школство и образование во годините кога во тие средини беше дозволено да се учи на македонски јазик во отворените македонски училишта. Не помалку вредни се и десетиците фотографии од учителите, кои во време на снимањето на ТВ-серијата беа во одминати години, а денес веќе не се меѓу живите – подвлекува Глигоровски. За богатата и историска содржина, неговата прва книга, „Првите учители на македонски јазик 1943-1948 г.“, ја добива државната награда за публицистика „Мито Хаџи Василев-Јасмин“.
– Во неа се регистрирани изјави и сеќавања на триесетина и повеќе македонски учители, кои во периодот од 1943 година (на првите слободни територии во Македонија) до 1948 година вршеле една значајна просветителска мисија. Во оваа книга се прикажува состојбата и во повоеното школство во Република Македонија – ни сподели Иван Глигоровски.
Собирајќи драгоцен фолклорен материјал, тој се зафаќа со пишување на обемната книга „Современи собирачи на народни умотворби“ (2008 г.). Во таа книга се претставени вкупно 20 македонски вљубеници на народното творештво.
– Круна на моето публицистичко творештво претставува монографијата „Македонски лингвисти“, прв и втор дел. Содржината (околу 830 страници и 170 фотографии) им е посветена на шеесетина македонски јазичари (лингвисти) што создале историски и многу значајни научни дела од македонската наука за јазикот: од азбука, правопис, граматика, учебници по македонски јазик, речник итн. – вели Глигоровски.
Две години подоцна ја објавува „Македонска историска читанка“, дело за нашите револуционери, за нашата далечна и блиска историја. Наскоро ќе бидат објавени: „По трагите и патиштата на македонското печалбарство“, „Индекс број 1“, „Првите гимназии во Македонија“, „Моите 460 телевизиски емисии“, „Македонски лингвисти“, трет дел, „Зубово, Струмичко“ (проширено издание), „Родољубивите копнежи на битолчанецот Ѓорѓи Котевски“, нова стихозбирка поезија…
