„Охридско лето“ одбележа 65 години
Со ангелскиот глас на првенката на Македонската опера и балет, сопранот Ана Дурловски, која настапи во придружба на ерменско-германската пијанистка Анахит Тер-Татшатјан, пред многубројна публика во црквата „Света Софија“ беше одбележан 65. роденден на фестивалот „Охридско лето“.
Директорот на „Охридско лето“, Ѓорѓи Цуцковски, честитајќи им го роденденот на вработените во оваа национална установа, но и на сите претходни директори и уметнички селектори што се вградиле во успешната фестивалска приказна, порача, идните генерации внимателно да се грижат за оваа врвна установа, која, како што додаде, претставува енциклопедиско национално богатство и редок пример за одржување на трајните вредности.
– Вечерва првпат се враќаме на корените, онака како што е формиран овој бесценето реномиран и општествено важен фестивал, во далечната 1961 со концерт на македонската оперска првенка Ана Липша-Тофовиќ, а денес со концерт на најреномираната македонска пејачка Ана Дурловски, овде во оваа света црква, под оваа божествена акустика. Ана, благословена со уникатна боја на гласот и магнетно сценско присуство допира до најпрестижните оперски и концертни сцени во светот. Виенската државна опера, „Метрополитен опера“ во Њујорк, „Дојч опера“ во Берлин… се само дел од престижните институции каде што Ана со себе носи дел од нашата татковина и претставува вистински културен амбасадор – рече Цуцковски.
Со својата колористичка перфекција и префинетост, сопранистката Ана Дурловски пееше инспиративно, со душа и срце, суверено владеејќи со подиумот во катедралната црква „Света Софија“.
– „Охридско лето“ е симбол на нашиот културен идентитет, на нашата духовна енергија. За секој уметник што настапува тука е како средба со историјата, со традицијата, со оваа енергија што ја има овој град. За мене е огромна чест и поттик да бидам уште подобра и одговорност да се носам со тежината на еден ваков фестивал. Неколкупати сум настапувала на фестивалот и можам да кажам дека моите почетоци на некој начин се на овој фестивал. Уште како студент во четврта година, ја имав честа круна на моето дипломирање да биде целовечерен концерт во црквата „Света Софија“ – рече Дурловски.
„Охридско лето“ низ годините прерасна во една од најзначајните музичко-сценски манифестации во Европа во која се вградиле голем број уметници од целиот свет, збогатувајќи ја фестивалската историја со незаборавни концерти и театарски претстави.
