Истражување
Истражувањето на „Индекс за цензура“ покажа дека 53 отсто од анкетираните продавачи на книги во Велика Британија биле замолени да отстранат одреден дел наслови од нивните полици, а половината од нив го направиле тоа. Исто така и десетици училишни библиотекари биле замолени да тргнат некои книги од нивните библиотеки, меѓу кои дел биле ЛГБТК+ наслови, пишува „Гардијан“.
Меѓу насловите на кои се приговарало се: „Оваа книга е геј“ од Џуно Досон, „Џулијан е сирена“ од Џесика Лав и „АБЦ прајд“ од Луи Стоуел, Ели Барнс и Ејми Фелпс. Зад повеќе од половина од овие приговори стојат родителите на децата.
– Цензурата е дефинитивно нешто што ги загрижува некои од нашите членови – рече Алисон Тарант, шефица на Здружението на училишни библиотекари на Велика Британија.
Таа додава дека има тренд на напади врз книги од квир-автори или книги со квир-ликови. Исто така, постојат неколку модели на цензура – на пример, наставникот може да побара од библиотекарот да отстрани некоја книга од своите полици, а понекогаш се кажува дека библиотеката може да поседува одредена книга, но дека таа не треба да биде изложена.
– Понатаму, постои самоцензура за да се избегнат непријатни ситуации. Овие забрани, се чини, се увезени од САД, каде што ситуацијата сериозно се вжештува. Обично се работи за групи на интерес, а не за поединци – вели Тарант.
Според неа, училишната библиотека е „единственото место што се занимава со секоја годишна група, секој предмет и секоја група, така што по самата дефиниција, ќе има некои книги во училишната библиотека што не се соодветни за некои деца“. Според Тарант, оваа практика не е добра за развојот на децата.
– Ако ученикот сака да дознае нешто повеќе за сексот или сексуалноста, подобро да отиде во училишната библиотека и да ги истражува ресурсите што ги има таму отколку да отиде на интернет и да истражува што има таму – рече Тарант.
