Скопје годинава одбележува значаен јубилеј од својата историја. На 13 ноември се навршуваат 75 години од ослободувањето на градот.
Пред 75 години, Скопје било ослободено од германските окупаторски воени единици. Утрото на 12 ноември 1944 година, започнале борбите за конечно ослободување на градот. Партизаните од 12-та, 3-та и од 16-та Македонска бригада се спуштиле од Водно и по деноноќните борби ги протерале и последните германски војници од градот. Утрото на 13 ноември со коњи промарширале низ градскиот плоштад каде што граѓаните ги поздравиле со цвеќиња.
По тој повод НУ Музејот на македонската борба за самостојност во соработка со Кинотека на Македонија и ООУ “Аврам Писевски“ село Бардовци на 13 Ноември (среда) во 12 часот го организира мултимедијалдниот настан “Наративни приказни за градот Скопје“. На настанот ќе говори Данило Коцевски, хроничар и раскажувач за градот, а ќе настапи и хорот од ООУ “Аврам Писевски“.
Програмата ќе биде збогатена со емитување на документарни филмови од периодот по ослободувањето на градот Скопје од Кинотека на Македонија. Модератор на настанот е Ана Вишинова, историчар и едукатор во Музејот на македонската борба.
