Во Ликовниот салон во ЦК„ Марко Цепенков“ вечерва од 18 часот, концерт ќе одржат Емили Христоска и Даниел Петрески, двајцата студенти на Факултетот за музичка уметност во Скопје. Ќе бидат исполнети композиции од познати комозитори, меѓу кои Глук, Чајковски, Рахманинов, Чилеа и други.
Прилепчанката Емили Христоска своето музичко образование го започнува во нижото музичко училиште „Ордан Михајловски – Оцка“ во Прилеп. Средно музичко училиште завршува во МУ во Битола. Моментално е студент на Факултетот за Музичка уметност во Скопје во класата на проф. Марија Муратовска Наумовска. Во текот на школувањето се има стекнато со повеќе награди од кои: неколку први награди на музичките натпревари во Македонија, прва награда на меѓународниот натпревар „Вера Ковач Виткаи” во Нови Сад, Србија. Учествувала на повеќе концерти организирани од факултетот како и на концертот за млади оперски надежи „Коста Трпков”, „Руска Романсијада” и други. Има учествувано на повеќе семинари по пеење кај проф. Марија Муратовска Наумовска, како и на семинарот по актерска игра кај проф. Филип Ристовски (Букурешт), и моментално е член на Битоската камерна опера.
Активен член е во професионалниот хор „Pro Ars”, Женскиот младински хор при- МКЦ под диригенство на маестро Сашо Татарчевски.
Кичевчанецот Даниел Петрески (пијано) своето музичко образование го започнува во ДМУ – Битола на насоката музичар теоретичар. Во текот на средното образование има освоено повеќе први награди на државните натпревари од областа на теориските предмети (солфеж, хармонија). Како втор инструмент ја изучува виолата и остварува учество на концерти со гудачки квартет и освојува неколку награди на натпревари за камерна музика. Во 2016 година започнува студии на Факултетот за музичка уметност – Скопје на одделот за музичка теорија и педагогија. Во 2018 година паралелно се запишува на вокално инструменталниот оддел – пијано во класата на проф. д-р Марија Ѓошевска, а корепетиција -практика изучува кај доцент д-р Елена Атанасовска Ивановска. Има настапувано солистички на полурецитал и на повеќе заеднички концерти во рамките на факултетот. Има освоено втора награда на Полифон конкурс (2019) организиран до ФМУ.
Ка.М.
