Земјите од Западен Балкан треба да имаат вистинска перспектива за членство во Европска Унија, бидејќи во спротивно постои ризик од враќање во 1990-тите, изјави денеска во Брисел претседателот на Европската комисија, Жан-Клод Јункер.
Јункер за перспективата за членство на тие земји разговараше со словенечкиот претседател Борут Пахор.
– Ако тие земји не станат членки на ЕУ, ризикуваме враќање во 90-те. Мислам дека тоа е прашање на војна или мир – рече Јункер на заедничката прес-конференција.
Зборувајќи за европската перспектива за Западен Балкан, Пахор посебно се осврна на Босна и Херцеговина, кон која рече дека треба да се биде „суптилен“, што не значи дека треба да и се попушта по прашањето за исполнување на критериумите за европска интеграција.
Јункер, кој на прес-конференцијата се појави со фластер преку образот, рече дека сака да нагласи дека се исекол утрово додека се бричел, за да не се протолкува „дека тоа му го направила британската премиерка Тереза Меј“.
По состанокот со Пахор, Јункер имаше средба со британската премиерка.
