Британските медиуми не ја напуштаат приказната околу нервниот отров со кој беше затруен поранешниот двоен агент Сергеј Скрипал. Така Би-би-си емитуваше разговор со Владимир Углев, научник кој признава дека помогнал да се развие нервниот агенс „новичок“ кој стана познат откако од него настрада Скрипал.
-Целта беше да се произведе многу посилна супстанца од нервниот агенс VX, дури и десет пати посилна. Ние го направивме тоа – тврди 71-годишниот Углев.
На прашањето „ако е отровот толку силен, како преживеал Скрипал“, Углев тврди дека рускиот агент примил само мала доза.
Неделава беше објавено дека отровот е доставен во течен облик. Углев е свесен за својата одговорност.
– Ова не се први жртви што ги носам на душа. Би можел да набројам уште десетина луѓе отруени со истата супстанца – вели Углев кој работел во државната лабораторија во Саратовската област на југозападот на Русија. Вели дека и самиот тој еднаш учествувал во инцидент со новичок.
– Тоа беше новичок А-240. Притоа ми искипа на мојата десна рака. Веднаш ја ставив во хлороводородна киселина и ја измив со пероксид – објаснува научникот, додавајќи дека тој и Скрипал настрадале од истиот тип на новичок.
