Две ракети лансирани од Либан рано утрово го вклучија алармот во северниот дел на Израел. Израелската армија објави дека одговорила на нападот со артилериски оган, пренесува „Ројтерс“. Другите агенции јавуваат дека никој не е повреден, ниту е направена материјална штета. Едната ракета била соборена од систем за противвоздушна одбрана, а другата паднала на ненаселена област.
Израел водеше војна во 2006 година против Хезболах, кој има упориште во јужен Либан, а во својот арсенал има напредни ракети, додава британската агенција. По војната меѓу Израел и Хезболах пред 15 години, границата е претежно мирна. Помалите палестински фракции во Либан спорадично отвораат оган кон Израел.
