Претставници на Пентагон на брифинг зад затворени врати на Капитол Хил им соопштиле на американските пратеници дека трошоците за воената операција против Иран достигнале повеќе од 11,3 милијарди долари само во првите шест дена од конфликтот, пишува „Њујорк тајмс“.
Според извори запознаени со брифингот, проценката не ги опфаќа сите трошоци поврзани со операцијата, како подготовките и распоредувањето на воена опрема и персонал пред почетокот на нападите. Поради тоа, законодавците очекуваат конечната сума значително да се зголеми додека Пентагон продолжува со пресметките.
Ова засега се смета за најсеопфатната проценка што Конгрес на САД ја добил, во услови на растечки прашања за целите, обемот и времетраењето на војната.
Претходно, „Њујорк тајмс“ и „Вашингтон пост“ и објавија дека претставници на одбраната на конгресни брифинзи изјавиле дека американската војска потрошила муниција во вредност од околу 5,6 милијарди долари во првите два дена од конфликтот.
Според проценките на Центар за стратешки и меѓународни студии, првите 100 часа од операцијата чинеле околу 3,7 милијарди долари, односно приближно 891 милион долари дневно.
Во првиот бран на бомбардирања била користена и лизгачката бомба AGM‑154 Joint Standoff Weapon, чија цена се движи меѓу 578.000 и 836.000 долари по парче. Како поевтина алтернатива, американската војска планира поголема употреба на муниција за директен напад Joint Direct Attack Munition (JDAM), чија бојева глава може да чини околу 1.000 долари, додека комплетот за наведување изнесува околу 38.000 долари.
Прашањето за финансирањето на војната предизвикува политички дебати во Вашингтон. Дел од републиканците, меѓу кои и сенаторот Мич Меконел, претседател на поткомитетот задолжен за финансирање на Пентагон, подолго време се залагаат за зголемување на буџетот за производство на муниција.
Од друга страна, некои републиканци се противат на ново зголемување на воените трошоци, додека демократите изразуваат резерви за евентуален итен пакет за финансирање сè додека администрацијата не понуди појасна стратегија и цел за ангажманот на САД во конфликтот.
