Полицијата со употреба на сила денеска ги потисна демонстрантите кои ги блокираа улиците во канадскиот главен град Отава, ја презеде контролата над камионите и го расчисти центарот на протестот пред парламентот.
Полицијата употреби бибер-спреј и шок-бомби во обид да ја растера толпата во Отава, по неколкудневните протести поради владините мерки.
Десетици камиони заминаа под зголемен притисок, зголемувајќи ги надежите на властите дека ќе го прекинат тринеделниот протест против мерките за борба против коронавирусот во земјата и Владата на премиерот Џастин Трудо.
Властите ја презедоа контролата врз улицата пред зградата на Парламентот, која беше блокирана од демонстрантите со нивните камиони од крајот на минатиот месец и која за време на викендот ќе беше претворена во карневал.
– Ви рековме да заминете. Ви дадовме време да заминете. Бевме бавни и методични, а вие бевте нападни и агресивни кон полицајците и коњите. Врз основа на вашето однесување, ние одговараме со вклучување шлемови и палки за наша безбедност – соопшти полицијата на Отава на Твитер.
Еден полицаец е полесно повреден, но нема повредени демонстранти, изјави вршителот на должноста началник на полицијата Стив Бел. Полицијата продолжува да работи на преземање контрола врз улиците на Отава, рече Бел.
Меѓу уапсените се и четворица водачи на демонстрантите, еден е пуштен со кауција, додека на другите им е одредена мерка притвор, се вели во соопштението на полицијата.
