Американската компанија „Џенерал атомикс“ е подготвена да ѝ продаде дронови „рипер MQ-9“ на Украина за еден долар. Според „Волстрит џурнал“, договорот би вклучувал дронови од постарата верзија „рипер“, но Киев треба да плати десет милиони долари за трансфер на беспилотните летала во земјата и уште осум милиони долари за нивно одржување. Договорот ќе вклучува и копнена контролна станица, која ќе ги контролира беспилотните летала речиси насекаде на територијата на Украина. Иако од постарата генерација дронот „рипер MQ-9“ има задоволителни способности: може да се управува од далечина или автономно, има максимална издржливост од 27 часа и може да достигне височина од 15.240 метри. Распонот на крилата му е 20 метри
Ново и помоќно оружје од САД за Киев
Предлогот „Ракети до голем дострел за еден долар“, што всушност значи дека компанијата „Џенерал атомикс“ од САД е подготвена да ѝ продаде на Украина дронови „рипер MQ-9“ за само еден долар, е идеја на Линден Блу, извршен директор на „Џенерал атомикс“, испратена како понуда до украинското воено аташе во Вашингтон минатата недела. Портпаролот на „Џенерал атомикс“, компанијата што ги произведува споменатите „рипери“, рече дека компанијата не може да го коментира предлогот, додавајќи дека сепак тие „веруваат дека на Украина ѝ е потребна способност слична на „рипер“, и тоа што е можно поскоро“.
– „Џенерал атомикс“ со месеци разговара за барањата на украинските вооружени сили со нивната влада и останува посветена на поддршката на секој можен начин – изјави Марк Бринкли, портпарол на „Џенерал атомикс“.
Досега од САД биле испорачувани за Украина само помали дронови
САД испорачаа повеќе од 700 мали беспилотни летала во Украина во текот на изминатата година, вклучувајќи и тактички дронови „свичблејд“. Овие дронови може да се носат во ранци и се користат за уништување цели. Тие беа широко користени од страна на украинската војска.
„Рипер“, сепак, е многу пософистициран дрон, со значително поголем дострел, брзина и можности. Може да се управува од далечина или автономно, има максимална издржливост од 27 часа и може да достигне височина од 15.240 метри. Распонот на крилата му е 20 метри и може да биде вооружен.
„Џенерал атомикс“ нуди постара верзија на дронот „рипер“, од типот „MQ-9A блок 1“, кој вообичаено чини неколку милиони долари по парче. Беспилотните летала би можеле да се користат за собирање разузнавачки информации, како и за надзор и извидување.
Пософистицираното беспилотно летало од серијата „рипер“, познато и како „сив орел“, исто така направено од „Џенерал атомикс“, ќе им овозможи на украинските сили да вршат надзор, но и напади над руските војници од побезбедна далечина. Белата куќа се спротивстави на напорите за обезбедување на „сивите орли“, со кои моментално управува американската војска, поради страв дека чувствителната технологија на бродот, вклучувајќи и камера, би можела да падне во руски раце доколку леталото биде соборено. Овој модел на „рипер“, кој е поголем и има поголема носивост, засега го користи само американското воено воздухопловство.
Сега се чека Белата куќа да одобри продажба на дроновите „рипер“, односно трансфер на технологија во Украина. „Џенерал атомикс“, наводно, предлага да ѝ го продаде директно на украинската влада, така што целата трансакција нема да оди преку американската влада.
Дроновите „рипер“ беа користени и во Авганистан
Кон крајот на 2022 година, САД распоредија осум дрона „MQ-9 рипер“ во Грција на една година. Беспилотните летала се распоредени во стратегиската воздухопловна база Лариса, во близината на Егејско Море, што им овозможува на беспилотните летала лесно да ги поддржат источните и јужните крила на НАТО. Беспилотните летала „MQ-9“ исто така одиграа значајна улога во војната во Авганистан.
Интересно е тоа што околу еден месец по почетокот на руско-украинскиот конфликт, американските воздухопловни сили (УСАФ) предложија испраќање на своите постари дронови „рипер“ во Украина. Сепак, Пентагон тогаш не се согласил, што предизвикало негодување кај украинското раководство.
Иако Пентагон и натаму одбива да испрати беспилотни летала „рипер“, во новиот пакет воена помош за Украина во вредност од над две милијарди долари, тие првпат подготвија ракети со поголем дострел, објавија американските медиуми што внимателно ја следат и ја анализираат целата ситуација околу помошта за Украина. Станува збор за бомба со мал дијаметар што се лансира од копно (ГЛСДБ), која има дострел од 150 километри, што е двојно повеќе од дострелот на ракетите што моментално ги користи Украина.
Од друга страна, според истите извори, Вашингтон го одбил барањето на Украина за ракети АТАЦМС со дострел од 297 километри.
Крстосувачките ракети ГЛСДБ ќе бидат истрелани од ракетниот лансер ХИМАРС и ќе ѝ овозможат на Украина да погоди цели што претходно беа надвор од нејзиниот дофат. ГЛСДБ е заеднички развиена од „Сааб“ и „Боинг“. Таа ја комбинира бомбата со мал дијаметар ГБУ-39 со ракетниот мотор М26.
ГЛСДБ е управувана со ГПС-уред, може да спречува одредени електронски попречувања, може да се користи во сите временски услови и може да се користи против оклопни борбени возила, според веб-страницата на „Сааб“. ГБУ-39, која би функционирала како боева глава на ГЛСДБ, има мали крила што се преклопуваат, кои ѝ овозможуваат да лизга повеќе од 100 километри доколку падне од вселенско летало и погоди цели со пречник од еден метар.
Системи „патриот“ распоредени во Полска
Во меѓувреме, системите „патриот“ распоредени во Полска, која граничи со Украина, „се првично оперативно подготвени“, објави Оперативната команда.
По ракетниот напад на полска територија во ноември, тогашната германска министерка за одбрана Кристин Ламбрехт и нејзиниот полски колега Мариуш Блашчак се согласија трите германски системи за противракетна одбрана „патриот“ да бидат распоредени во Полска.
Германски војници се стационирани во Полска, за од 16 јануари за да обезбедат безбедно доставување на системот. Целта на мисијата е да се заштити воздушниот простор на НАТО, како и полската територија и инфраструктурата и населението на земјата.
Украинци пристигнаа во Германија на обука за употреба на ракетните системи „патриот“
Група од 70 украински војници пристигна во Германија во вторникот за да учествува на обука за користење на моќниот систем за противвоздушна одбрана „патриот“, кој Берлин ќе ѝ го стави на располагање на Украина за да помогне во одбраната од руските воздушни напади. Според безбедносни извори во Берлин, обуката на украинските војници веќе започна. Германската влада, по консултации со САД, во јануари се согласи да го пренесе системот за воздушна одбрана „патриот“ во Украина за да ја поддржи земјата додека се брани од руските напади.
