Украина денеска ја нарече Русија терористичка држава пред Врховниот суд на ОН на почетокот на сослушувањето во случајот за поддршката на Москва за проруските сепаратисти обвинети за соборувањето на летот MХ17 на Малезија ерлајнс во 2014 година.
Тоа е првпат правните претставници на Украина и Русија да се сретнат пред Меѓународниот суд на правдата (МСП), највисокиот суд на ОН, откако Москва ја почна специјалната воена операција во Украина на 24 февруари 2022 година.
Беа испратени правни тимови со десетици претставници од секоја страна.
Судскиот совет од 16 судии на МСП ја започна расправата за тврдењето на Украина дека Москва го прекршила антитерористичкиот договор на ОН со опремување и финансирање на проруските сили за кои меѓународните инспектори заклучија дека собориле авион над источна Украина, при што загинаа сите 298 патници и членови на екипажот.
Двајца Руси и еден украински сепаратист се осудени од холандскиот суд за убиство во случајот со летот МХ17, кој беше соборен со проектил од руско производство на 17 јули 2014 година, над источна Украина, што ја држат проруските сепаратисти.
Во своето воведно обраќање, украинскиот амбасадор Антон Кориневич го коментираше уништувањето на хидроелектраната Нова Каховка во јужниот регион Херсон во Украина, која беше пробиена неколку часа претходно.
Киев вели дека Русија ја разнела браната.
Некои руски официјални лица рекоа дека била уништена од украинско гранатирање, додека други рекоа дека пукнала сама од себе.
– Русија не може да не порази на бојното поле, па таргетира цивилна инфраструктура. Токму денеска, Русија разнесе голема брана… предизвикувајќи значителна евакуација на цивили, еколошка штета и загрозување на безбедноста на нуклеарната централа Запорожје – рече Кориневич на сослушувањето.
Тој додаде дека „дејствата на Русија се акции на терористичка држава“.
