Американскиот претседател Џо Бајден на брифинг за новинарите синоќа претпостави дека по истекување на рокот на Поглавје 42, правило според кое се укинуваат пандемиските мерки за нелегалните мигранти, на границата меѓу САД и Мексико „некое време ќе биде хаос“.
САД распоредуваат повеќе од 24.000 агенти и безбедносни сили на својата јужна граница со Мексико, бидејќи администрацијата на Бајден очекува голем прилив на мигранти кога ќе истечат мерките против пандемијата, изјави американски официјален претставник.
Мерката позната како „Мерка 42“ треба да истече в четврток во 23.59 часот по вашингтонско време (5.59 по средноевропско време). Мерката, воведена во 2020 година како дел од борбата против ковид-19, го оневозможи барањето за азил во САД и дозволи мигрантите да бидат депортирани во Мексико без одлагање.
– Имаме повеќе од 24.000 агенти и членови на безбедносните сили распоредени на границата, како и повеќе од 1.000 координатори на граничната полиција, изјави функционерот, кој сакал да остане анонимен – пренесе Бета.
Ова е рекорден број полицајци и ресурси распоредени на границата за да се подготват за неколкуте тешки кои се очекуваат, додаде тој.
Тука не се вклучени 1.500 војници кои Министерството за одбрана ќе ги распореди на границата со Мексико, како засилување за 2.500-те војници кои се веќе присутни на тоа место.
САД, исто така, планираат да го зголемат бројот на летови за враќање и да зголемат до 7.000 дополнителни сместувачки места во специјализираните центри, рече тој.
Бајден изјави дека администрацијата работи на тоа измените на правилата, усвоени од неговиот претходник Доналд Трамп, да донесат некаков ред во справување со имиграцијата. Преку Мексико во САД сакаат да влезат не само милиони од Мексико, Гватемала, Куба, Хаити, Венецуела или Хондурас, туку и десетици илјади од земји како Авганистан и Индија. Според американската служба за гранична и царинска контрола, за фискална 2022 година над 46.000 пристигнале и од Украина и Русија, бегалци од мобилизацијата и војната на Путин во Украина. Лани на јужната граница на САД пристигнале и околу15.000 турски имигранти и околу 6.000 од Романија.
– Претстои да видиме како да се воведе ред во сето ова, некое време ќе биде хаотично – изјави Бајден.
Пандемиските ограничувања дозволуваа американските службеници брзо да ги враќаат имигрантите назад. Нивниот рок истекува неделава, по што се воведуваат реформи во системот за справување со огромната имиграција на јужната граница. Новите мерки предвидуваат обесхрабрување на они кои планираат да поминат долг пат за нелегално да ја преминат границата, предлагајќи им законска можност да дојдат во САД со поднесување барање преку владина мобилна апликација, ако имаат спонзор и ги поминат проверките.
За ова Бајден вчера цел час телефонски разговараше и со Андрес Мануел Лопез Обрадор, претседател на Мексико.
Мексиканско-американската граница со протега над 3.100 километри. Најголемиот број нелегални имигранти доаѓаат токму од Мексико, од каде лани агентите пресретнале над 800.000, затоа оваа земја е клучен фактор во успехот на какви и да било планови на Вашингтон за справување и контрола на имиграцијата на јужната граница.
Мигрантите постојано пристигаат. Граничните патроли во регионот на релативно мирниот град Ел Сентро минатата недела фаќале по околу 260 имигранти дневно, притоа таа бројка во претходната недела изнесувала 90. Неделава пак, агентите на јужната граница идентификувале имигранти од вкупно 22 земји.
