Трговскиот дефицит на САД скокна во март на највисоко ниво откако Министерството за трговија почна да објавува податоци, што е одраз на порастот на увозот, бидејќи компаниите се обидуваат да ги надминат трошоците за новите царини.
Увозот на стоки и услуги во САД се зголеми за 4,4 проценти во март во споредба со февруари и изнесуваше 419 милијарди долари. Извозот остана повеќе или помалку на исто ниво како и во февруари и изнесуваше 278,5 милијарди долари.
Ова значеше дека дефицитот на САД во трговијата со стоки и услуги се зголеми за 14 проценти во март во споредба со претходниот месец и изнесуваше 140,5 милијарди долари. Износот е највисок од 1992 година, кога Министерството почна да објавува месечни извештаи за трговијата.
Дефицитот во трговијата со стоки се зголеми за 11,2 проценти, на 163,5 милијарди долари, што е воедно и највисока вредност од 1992 година.
Увозот на стоки скокна за дури 5,4 проценти на месечна основа, на рекордни 346,8 милијарди долари. Извозот се зголеми за 0,7 проценти, на рекордни 182,3 милијарди долари – соопшти Министерството.
САД го забележаа најголемиот трговски суфицит со Холандија во март, од 4,5 милијарди долари.
Најголем дефицит е забележан во трговијата со Европската Унија, во износ од 48,3 милијарди долари. На второ место е Кина, со која САД регистрираа дефицит од 24,8 милијарди долари, а на трето место е Мексико со 16,8 милијарди долари, според податоците од Министерството за трговија.
Во првите три месеци од оваа година, дефицитот на САД во трговијата со стоки и услуги речиси се дуплираше во споредба со истиот период минатата година. Извозот се зголемил за 5,1 процент на годишно ниво, а увозот за 23,3 проценти, пресмета Министерството.
На почетокот на април, САД објавија царини од 10 проценти за земјите од целиот свет. Тие исто така планираат „реципрочни“ царински давачки кон трговските партнери со кои континуирано бележат дефицит во трговијата.
Претседателот Доналд Трамп потоа го одложи воведувањето на новите тарифи за 90 дена, велејќи дека сака да обезбеди доволно време за преговори со трговските партнери.
