Шефот на руската паравоена група Вагнер, Евгениј Пригожин денеска го обвини Генералштабот на руската армија за „предавство“ затоа што одби да им обезбеди опрема на неговите платеници на линијата на фронтот во источна Украина.
Светските агенции коментираат дека изјавата на Пригожин укажува на зголемена тензија меѓу неговата Вагнер група и руската армија, бидејќи се чини дека двете сили се во конкуренција на теренот во Украина.
Тензиите станаа сè повидливи во последниве недели додека руските сили се обидуваат да го заземат источниот град Бахмут, при што војската и Вагнер тврдат дека напредуваат, со понекогаш спротиставени информации.
– Началникот на Генералштабот и министерот за одбрана даваат наредби по секоја цена, барајќи не само да не се дава муниција на паравоената група Вагнер, туку и да не и се помага во воздушниот транспорт – рече Пригожин во аудио порака објавена на Телеграм, пренесе Бета.
Шефот на Вагнер оцени дека постои „фронтално противење, кое не е ништо повеќе од обид да се уништи Вагнер“.
– Тоа може да се спореди со предавство бидејќи Вагнер се бори за Бахмут и секој ден трпи стотици жртви – рече тој.
Пригожин во минатото постојано ја критикуваше руската врховна команда, но отворената критика кон началникот на Генералштабот Валериј Герасимов и министерот за одбрана Сергеј Шојгу, две клучни фигури во владата на Владимир Путин, очигледно е зголемување на тензиите.
Ниту руската армија ниту Министерството за одбрана досега не реагираа на изјавите.
