Поранешниот француски претседател се соочува со затворска казна
Поранешниот француски претседател Никола Саркози беше прогласен за виновен пред Апелацискиот суд во средата (14.февруари), за незаконско финансирање на неговата кампања за реизбор во 2012 година, поддржувајќи ја претходната одлука на понискиот суд. Тој беше осуден на една година затвор, од која половина е условна, што значи дека тој нема да биде во затвор за тоа време, но најверојатно ќе мора да носи електронска белезица. Тој беше осуден на една година затвор во 2021 година, но таа казна беше прекината откако поднесе жалба.
Саркози беше претседател од 2007 до 2012 година и, покрај низата судења и истраги поврзани со финансирањето на претседателската кампања, тој останува влијателна личност меѓу конзервативците. Тој е во пријателски односи и со актуелниот претседател Емануел Макрон. Тој отсекогаш цврсто ги негирал обвинувањата дека неговата конзервативна Републиканска партија, тогаш позната како УМП (Сојуз за народното движење), соработувала со фирмата за односи со јавноста „Бигмалион“ за да ја прикрие вистинската цена на неговата изборна кампања, обележана со раскошни настани, досега невидени во француската политика.
На суд, тој ја префрли вината на некои членови на тимот што ја водеше неговата кампања.
– Не избрав ниту еден доставувач, не потпишав ниту една понуда, ниту една фактура – тврдеше Саркози на сослушувањата.
Франција има строги правила за трошење на кампања. Обвинителите тврдат дека компанијата, наместо во кампањата, испраќала фактури до УМП. Тие тврдат дека Саркози за изборната кампања во 2012 година потрошил 42,8 милиони евра, речиси двојно повеќе од дозволеното.
