Обединетите нации (ОН) се подготвуваат за до четири милиони бегалци од Украина доколку војната продолжи да ескалира. Илјадници веќе се префрлија преку границите во соседните земји, како што се Полска, Молдавија, Словачка и Русија, изјави денеска во Женева портпаролот на агенцијата за бегалци на ОН, УНХЦР. Агенцијата соопшти дека е подготвена да им пружи помош на Украинците кои бегат.
УНИЦЕФ го зајакнува своето присуство и во соседните земји Молдавија, Романија и Полска, како и во Унгарија и Словенија. Засолништа за жени и деца ќе се постават покрај рутите на движење. Канцеларијата за човекови права на ОН соопшти дека примила извештаи за 25 убиени и 102 повредени цивили од руската инвазија во четвртокот во раните утрински часови.
Најголем дел случаи се пријавени од области под контрола на украинската влада, рече портпаролката, додавајќи дека се претпоставува дека вистинските бројки се многу поголеми. Украина има околу 42 милиони жители.
