Кај носачот на авиони вреден дури 13 милијарди долари се утврдени голем број недостатоци, иако од канцеларијата за тестирање на Пентагон уверуваат дека проблемите се надминуваат
Извештајот на Пентагон што ја вознемири јавноста
Најновиот и наедно најскап воен брод на американската морнарица, носачот на авиони „Џералд Р. Форд“, вреден 13 милијарди долари, „допрва треба да покаже дека може ефикасно“ да се брани од противбродски ракети и други закани, според новата процена на канцеларијата за тестирање на Пентагон.
„Шарените“ ефекти на ракетните пресретнувачи, радарите и системите за дистрибуција на податоци на тестираниот брод ја ограничија способноста за уништување на моделите на надоаѓачкото оружје, иако сензорските системи „на задоволителен начин откриваа, следеа и погодуваа цели“, се вели во извештајот што „Блумберг њуз“ го добил уште пред неговото официјално објавување.
Според извештајот на пет страници, носачот што бил изграден од Хантингтон Ингалс Индустрис сè уште е оптоварен со „ниска или непозната сигурност“ на неговите системи за лансирање и враќање на авионите.
И неодамнешните шок-тестови за да се процени ранливоста на клучните системи „идентификуваа неколку недостатоци во дизајнот што претходно не беа идентификувани“, соопшти канцеларијата за тестирање на Пентагон. Во извештајот се наведува дека морнарицата веќе идентификувала неколку опции за подобрување на новата класа носачи на авиони во однос на „подводните закани“.
„Ризикот се намалува“
Недостатоците што опстојуваат ги поткопуваат надежите на морнарицата да го прикаже „Џералд Р. Форд“ како прв во новата класа носачи на нуклеарен погон што можат да ја промовираат моќта на САД на глобално ниво и кои се борбено поспособни, посигурни и поисплатливи од класата „Нимиц“, која треба да ја заменат.
Последната процена значи и нови прашања за претставниците на Пентагон и пратениците за степенот до кој морнарицата ќе покаже подобрувања пред „Форд“ да биде распореден на средината на септември на својата прва патрола со авиони и бродови за поддршка.
Извештајот, кој содржи некласифицирани и „контролирани некласифицирани“ информации и беше проследен до морнарицата, покажа дека во овој момент е можна „само ограничена процена“ на ефективноста на борбениот систем. Се вели дека Николас Гертин, новиот шеф на канцеларијата за тестирање, планира да испрати до Конгресот привремен извештај за способностите на „Форд“ за самоодбрана до 30 септември.
Во соопштението, Командата за поморски системи ја поздрави можноста да го разгледа извештајот и да коментира за нацрт-оцената. „Генерално“, се наведува, неодамнешните тестови по испораката на носачот на авиони „покажуваат дека се намалува ризикот доверливоста на системот да влијае на исполнувањето на мисијата“.
Наоѓањето одговори на прашањата што предизвикуваат загриженост за одбранбените системи на „Форд“ – со радарот со двоен опсег, усогласувањето на податоците и другите напредни способности – станува уште поитно, бидејќи Кина ја проширува својата флота од патролни чамци, фрегати, крстосувачи и конвенционални подморници со напредни противбродски крстосувачки проектили.
Дефекти на артилерискиот систем
Трите претходни поморски тестови на системот за самоодбрана на „Форд“ на специјализиран брод дизајниран да ги процени овие перформанси, „не се погодни за процена на борбената способност на борбениот систем против суперсонични противбродски крстосувачки ракети и супсонични маневарски ракети, а не се планирани идни тестови против закани, кои би можеле да дадат дополнителни податоци“, наведуваат од канцеларијата за тестирање.
Дел од артилерискиот систем на бродот, како што соопшти канцеларијата за тестирање, имал голем број дефекти, поврзани со доверливоста, што во неколку случаи го спречило системот да ја изврши мисијата.
По серијата дополнителни процени и обука од страна на воздушните сили „Форд“, се планира носачот да замине во повеќе операции со поголем број сојузници до крајот на летото – изјави за новинарите контраадмиралот Џејмс Дауни, извршен офицер на програмата на морнарицата за носачи на авиони.
Дауни вели дека морнарицата е сигурна во борбените системи на бродот, спроведени и проценети се тестови на море, и доделен е сертификат што се однесува до областа на борбените системи.
Канцеларијата за тестирање соопшти дека носачот најверојатно нема да ја исполни својата цел во однос на бројот на прелети што може да ги направи за 24 часа, заклучувајќи дека е „заснован на нереални претпоставки“.
Не работи ниту електромагнетниот катапулт
Беше речено и дека за време на 8.157 полетувања и враќања на авионите минатата година, новиот електромагнетен систем за катапулт на носачот, развиен од „Џенерал атомикс“, покажал сигурност при 272 лансирања, односно многу под потребните 4.166. Исто така, неговиот систем за запирање на авионот по слетувањето покажа стапка на доверливост на 41 слетување, што е „значително под условот од 16.500“, соопшти канцеларијата за тестирање.
Командата за поморски системи соопшти дека за време на неодамнешниот престој на „Форд“ на море, носачот на авиони ги завршил сите потребни тестови, предвреме ја завршил планирана работа, ја подобрил доверливоста на системот за новите технологии и служел како платформа за спроведување обука на пилоти на носачот на авиони на Источниот брег за повеќе од 400 новоквалификувани и преквалификувани пилоти.
Повеќе од 8.100 операции за лансирање и слетување, како што соопшти на крајот командата, ги истакнуваат растечките способности на „Форд“ и обезбедуваат зголемена доверба дека целосно обучениот екипаж и воздухопловните сили на него ќе ја постигнат потребната стапка на производство на летови.
