Конвој автомобили од Меѓународната агенција за атомска енергија (МААЕ) утрово тргна од Киев кон нуклеарната централа Запорожје, во југоисточниот дел на Украина, јавија британските меидуми, повикувајќи се на сведок од местото на настанот.
Не е познато за кога е планирано мисијата на МААЕ да пристигне до најголемата нуклеарна централа во Европа, што сега е под контрола на руските сили.
Руската и украинската страна меѓусебно се обвинуваат за гранатирање на областа на нуклеарната централа.
Постојаниот претставник на Русија во меѓународните организации во Виена изјави дека мисијата на МААЕ веќе отпатувала во регионот Запорожје, пренесоа руски медиуми.
Оттаму додаваат дека мисијата на МААЕ е придружувана од тим претставници на ОН.
Експертите на МААЕ ќе ја проценат физичката штета на нуклеарката, ќе ја утврдат функционалноста на безбедносните системи, ќе дадат оценка за условите на персоналот и ќе извршат итни безбедносни проверки.
Запорожје е најголемата нуклеарна централа во Украина, но и во Европа, а од март е под контрола на руските сили.
