Вишиот суд во Белград денеска треба да им ја соопшти пресудата на Владимир и Миљана Кецмановиќ, родителите на момчето кое на 3 мај 2023 година застрела девет ученици и еден обезбедувач и повреди уште пет ученици во основното училиште „Владислав Рибникар“. Судот ќе донесе првостепена пресуда против која одбраната и обвинителството ќе имаат право на жалба до Апелациониот суд.
Овој судски процес од самиот почеток е затворен за јавноста, но пресудата ќе биде јавно објавена. Главниот јавен обвинител на Вишото јавно обвинителство во Белград, Ненад Стефановиќ побара од судот максимални затворски казни за Кецмановиќи. Тој во завршните зборови му предложи на судот Владимир Кецмановиќ да биде осуден на единствена затворска казна од 14 години и 11 месеци за кривични дела тешко кривично дело против општата безбедност и запуштање и злоупотреба на малолетно лице. За Миљана Кецмановиќ предложи единствена затворска казна од пет години и пет месеци за сторени кривични дела недозволено изработување, држење, носење и тргување со оружје и распрскувачки материи и запуштање и злоупотреба на малолетно лице.
Обвинителот предложи максимална казна затвор од три години за инструкторот за стрелање Немања Маринковиќ за кривично дело давање лажен исказ. Стефановиќ смета дека за семејството Кецмановиќ нема олеснителни околности, туку само отежнувачки бидејќи не изразиле ниту каење ниту сочувство кон жртвите. Тој рече и дека Миљана Кецмановиќ се претставувала како беспрекорна мајка, додека со жртвите се однесувала со дистанца и рамнодушност. Тој потсети и на лажното сведочење на Немања Маринковиќ во истрагата, со кое се обидел да ја пренасочи истрагата во друга насока. Од друга страна, одбраната тврдеше дека вината на обвинетите не е докажана.
Момчето К.К, кое во моментот на ова кривично дело сè уште немало 14 години и затоа не е кривично одговорно, на 3 мај во училиште пукал со два пиштоли на неговиот татко, кои ги зел на 1 мај минатата година. Кобниот ден ги ставил во ранец, отишол на училиште и на првиот час уби 10 луѓе, а повредил уште пет деца и наставник по историја.
