Специјалниот претставник на САД за Западен Балкан, Габриел Ескобар, денеска изјави дека САД ќе ги признаат резултатите од изборите во четири општини на северот на Косово, дури и ако Србите ги бојкотираат и ги покани да се вратат во институциите на Косово.
Ескобар за „Танјуг“, одговори на прашањето, дали локалните избори на северот на Косово би биле легитимни доколку Србите ги бојкотираат? Тој рече дека тоа што некои политички партии ги бојкотираат изборите не ги одредува резултатите од изборите и рече дека САД ќе ги признаваат резултатите од изборите во секој случај.
– Апелирав до Србите да учествуваат на изборите. Разбираме многу работи за кои сметаат дека се проблематични, но дефинитивно треба да учествуваат. Ако не учествуваат, не значи дека не ги поддржуваме изборите. Владата на Косово има уставна обврска. Ќе има избори и ќе ги признаеме резултатите и се надеваме дека Србите во одреден момент ќе се вратат – изјави Ескобар.
Тој рече дека САД бараат од Србите да се вратат во полициските одделенија, бидејќи не може да има заедница која нема општински служби и која нема полиција.
– Побаравме Србите да се вратат во косовските институции за да нема причина таму да бидат присутни етничките Албанци. Ова е навистина сложено прашање. Ќе биде потребен компромис од двете страни за да се најде решение – рече Ескобар.
Тој нагласи дека заканите кон српската заедница во Косово мора да престанат „од сите страни“, за овие луѓе да живеат на „мирен и демократски начин“ во демократско општество.
– Палењето возила и недвижен имот и заканите за луѓето кои сакаат да се интегрираат не доаѓаат од етничките Албанци, туку од Србите, така што мислам дека заканите против српската заедница во Косово треба да престанат од сите страни – рече Ескобар.
САД очекуваат Косово и Србија да понудат временска рамка за целосна имплементација на Охридскиот договор и првични предлози за формирање на Заедницата на српските општини (ЗСУ) – рече Ескобар и оцени дека е крајно време да се формира ЗСУ.
– Очекуваме првични предлози за формирање на ЗСО, но очекуваме и одредена временска рамка за целосно спроведување на Охридскиот договор. Тоа значи дека сите страни мора да дојдат подготвени – рече тој.
Коментирајќи го фактот дека на 10-годишнината од потпишувањето на Бриселскиот договор, ЗСО се уште не е формирана, Ескобар рече дека се согласува со американскиот амбасадор во Србија, Кристофер Хил, во оценката дека е крајно време за таа да се формира.
– Хил е во право. Тоа е постоечка законска обврска и ние ја поддржуваме. Во последната година видовме позитивни сигнали во оваа смисла, пред се поради поддршката од меѓународната заедница. Неодамнешниот Охридски договор дава временска рамка за страните да ја искористат за да се договорат за овој договор, вклучително и ЗСО. Станува збор за почетокот на мај, кога страните ќе разговараат за оваа и за другите постоечки обврски – изјави Ескобар.
Во врска со неговата претходна изјава дека ЗСО ќе се формира „со или без косовскиот премиер Албин Курти“, тој рече дека ЗСО е дел од бриселскиот договор и договорот во Охрид, како и од европскиот план и дека ова е нешто што сигурно ќе се постигне во иднина.
– Единствено прашање е до каде Владата на Косово сака да прифати, односно да ги прифати постоечките обврски и да продолжи. Реков дека сум подготвен да помогнам да се создаде дијалог за да се направи ова „победа-победа“ за двете страни. Мислам дека тука не треба да има конфликт, туку само обврска – изјави Ескобар.
Тој изјави дека не е на САД да одлучуваат по кој модел ќе се формира ЗСО и дека зависи од страните кои учествуваат во преговорите.
– Претставниците на Европската унија дадоа неколку предлози кои се во согласност со правилата на ЕУ и уставноста на Косово, но двете страни треба да одлучат што е најдобро за нив – заклучи Ескобар.
