Четврти ден од потрагата по Матеј Периш во Белград
Пред ноќниот клуб во Белград, каде што младото момче последен пат било забележано, на брегот на реката Сава, патролираат две речни полициски патроли во потрага Матеј Периш (27) од Сплит, кој исчезна ноќта меѓу 30 и 31 декември.
Според неофицијални информации што ги пренесуваат некои од регионалните медиуми, Матеј во еден момент станал од масата во клубот, каде што бил со пријателите, и се упатил кон тоалетот. Бидејќи имало многу метеж, тој решил да излезе надвор, кога надзорните камери последен пат го забележале како се спушта по скалите кон водата. Од тој момент никој веќе не го видел.
Кога во еден момент пријателите сфатиле дека Матеј го нема веќе подолго време, почнале да го бараат внатре. На излегување од клубот виделе дека јакната му останала во гардеробата. Тие ја продолжиле потрагата наоколу. По пребарувањето, пријателите заминале до местото во кое бил сместен и каде што се надевале дека тој ќе дојде наутро. Кога и тоа не се случило, се јавиле со полиција.
– Припадниците на МВР интензивно трагаат по М. П. (27), чие исчезнување на 31.12.2021 година во 18 часот го пријавил негов пријател. Полициските службеници од моментот на пријавувањето на исчезнувањето ги преземаат сите мерки и дејства во согласност со законот за пронаоѓање на исчезнатиот млад човек – соопшти вчера полицијата.
Доцна синоќа била пребарувана и областа Ушќе.
Ненад Периш, таткото на исчезнатиот млад човек, кој вчера дошол во Белград за да ѝ помогне на српската полиција во потрагата, по пристигнувањето, изјавил дека единственото нешто што му е важно е да го најде, а потоа открил како изгледал животот на Матеј во Сплит.
– Родителот секогаш тргнува од најлошите претпоставки и тоа е она што ме прогонува веќе три дена и три ноќи. Матеј е спортист, економист, има девојка во Сплит. Ништо не ми укажува дека тоа требало да се случи. Би замолил да пријават, доколку некој нешто знае за мојот син, барем и анонимно – изјавил синоќа Ненад Периш за медиумите истакнувајќи дека српската полиција одлично си ја врши работата и дека им верува до крај.
Ги замолувам граѓаните на Србија да пријават сѐ што знаат, во име на моето семејство им благодарам на сите, порача таткото на исчезнатото момче, отфрлајќи ја можноста за давење на син му.
„Матеј тренира, беше исклучително силен тип, спортист, непушач. Мислам дека апсолутно неговата состојба, познавањето на пливањето и вештините, не доаѓа предвид да падне во реката и дека тоа би била околност што може да доведе до трагична несреќа – изјавил Периш.
