Значителен број граѓани на Хрватска и денеска учествуваа во општиот бојкот на продавниците и услугите поради високите цени, покажуваат најновите податоци на Даночната управа.
Бројот на издадени фискални сметки во малопродажбата од полноќ до 15 часот е намален за 31 отсто, додека вкупната вредност на издадените сметки е за 42 отсто помала во споредба со петокот, 17 јануари, кога немаше бојкот.
Во однос на претходниот петок, кога се одржа првиот еднодневен бојкот, бројот на издадени сметки во малопродажбата е за 18 отсто поголем, а вкупната вредност на издадените сметки за 15 отсто повисока.
Според пишувањата на медиумите во Подгорица, првиот бојкот на супермаркетите и продавниците, што почна утрово во Црна Гора, бил успешен, бидејќи, како што велат, речиси и да немало купувачи.
Во Будва, Никшиќ и Бијело Поље речиси и да нема купувачи, во Подгорица има многу помалку од вообичаено, а слична е ситуацијата и во Бар, објавија подгоричките медиуми.
Сепак, нема официјални податоци од Даночната управа за тоа колку помалку фискални сметки се издадени денеска и колку помалку пари граѓаните оставиле во супермаркетите.
