Во Вашингтон денеска се одржува Советот за енергетика на Европската Унија и САД, за да се промовира трансатлантската енергетска соработка, а шефот на европската дипломатија Жозеп Борел пред состанокот изјави дека е посветен на обезбедување енергетска сигурност за Унијата и нејзините соседи, вклучително и Молдавија, Украина и Западен Балкан.
Борел на својот блог пред средбата напиша дека енергетиката отсекогаш била меѓу најважните геополитички прашања и дека сега, со високите цени и проблемите со снабдувањето со гас предизвикани од кризата со Русија, таа е на врвот на агендата на Брисел.
Тој изјави дека е неопходно да се издржат овие краткорочни притисоци со почитување на долгорочната стратегија за преминување кон зелена енергија и дека Советот за енергетика ЕУ-САД во Вашингтон ќе ја интензивира трансатлантската соработка на овој фронт.
Цените на енергијата скокнаа поради проблемите со глобалната побарувачка и понудата, рече Борел. Цената на гасот во ЕУ е шест до десет пати повисока од минатата година, што ја оптоварува цената на струјата, но и целиот пазар на електрична енергија во Европа, наведува Борел.
– Ова веќе ја зголеми инфлацијата на крајот на 2021 година. Ако цените на енергијата останат високи во 2022 година со зголемена инфлација, тоа сериозно ќе влијае на закрепнувањето по пандемијата – рече Борел.
Енергетската политика отсекогаш се рефлектира во односите меѓу ЕУ и Русија, рече Борел, додавајќи дека ЕУ увезува повеќе од 40 отсто од гасот од Русија, а 60 отсто од приходите од увозот на Русија доаѓаат од ЕУ.
Европскиот функционер смета дека со намалување на целокупниот увоз на гас од Русија, ЕУ би инвестирала не само во зелената транзиција, туку и во намалувањето на стратешката зависност.
Но, во претходните години Русија ја зголеми отпорноста на економските санкции, зголемувајќи ги своите девизни резерви, повеќе отколку што направи ЕУ за да го зголеми својот капацитет за потенцијално намалување на испораките на гас, рече Борел.
Тој додаде дека Брисел треба итно да размисли за развој на стратешките резерви на гас на ЕУ и можноста за заедничка набавка на гас.
Според Борел, Русија претходно ги користела енергетските резерви за политички цели.
Шефот на европската дипломатија најави дека ЕУ ќе разговара со САД за намалување на зависноста од рускиот гас и можното снабдување на Европа со американски течен природен гас.
– Соединетите Американски Држави се веќе најголемиот снабдувач на течен природен гас во Европа и ја интензивираме соработката за да се осигураме дека ова снабдување е сигурно во наредните месеци – рече Борел.
