По земјотресот што ја погоди Турција, Нергис и Чумали Бакајли ја изгубиле секоја трага на нивното шестмесечно бебе, кое е родено предвреме. По многудневна тага и вознемиреност, турската двојка доживеала олеснување кога тие дознале дека детето е живо и здраво, пишуваат турските медиуми.
Бебето на Нергис и Чумали Бакајли се лекувало во болница во Караманмарас поради крварење во мозокот по предвремено породување. Откако земјотресите ја оштетија оваа болница, бебето прво било префрлено во градската болница во Мерсин, а потоа во болницата на медицинскиот факултет на Универзитетот Селчук.
Вработените во болницата во Селчук ги контактирале родителите и рекле дека бебето е со нив, живо и здраво. Во интервју за турските медиуми, мајката изјави дека сега е време за повторно обединување на семејството.
– Пред земјотресот ќерка ми беше во болница. По земјотресот не можевме да ја најдеме. Се јави докторката и рече дека нашата ќерка е таму и дека нејзината состојба е многу добра. Господ да ги благослови сите. Се трудиме да опстанеме како семејство – вели мајката.
