Рускиот претседател Владимир Путин утре во Москва ќе се сретне со српскиот претседател Александар Вучиќ, при што ќе се разговара за соработката меѓу двете земји, балканскиот регион и меѓународната состојба.
Кремљ денеска и официјално ја потврди средбата која се најавуваше повеќе месеци.
Вучиќ најави дека една од темите на разговор ќе биде состојбата на Косово, каде тој и косовскиот претседател Хашим Тачи го отворија прашањето за менување на границите, а во текот на викендот имаше сериозен безбедносен инцидент околу езерото Газивода.
– Растечките тензии на Балканот ќе бидат една од темите за разговор, изјави Дмитриј Песков, портпаролот на Путин – додавајќи дека сепак средбата била планирана подолго време и не е директно предизвикана од балканските тензии.
