Претседателот на САД Џо Бајден својот говор за состојбата на нацијата ноќеска го започна со остра осуда на рускиот претседател Владимр Путин за неговата воена агресија во Украина и се закани дека ќе го заплени „нечесно“ стекнатото богатство на руските олигарси.
Демократијата и слободниот свет ќе победат над тиранијата, порача тој.
– Путин го наруши слободниот свет, мислеше дека ќе влезе во Украина и светот ќе се оттргне. Наместо тоа тој удри во цврст ѕид. Тој се соочи со украинскиот народ – изјави Бајден.
– Путин греши, ние сме подготвени и направивме коалиција, и заедно со ЕУ, Велика Британија и други земји како Јапонија, Австралија, Нов Зеланд па и Швајцарија, воведовме жестоки санкции за да го отсечеме од неговиот воен буџет – кажа американскиот претседател.
Бајден се обрати и до руските корумпирани олигарси со порака „ќе го најдеме вашето нечесно стекнато богатство“.
Истакна дека Министерството за правда на САД оформи работна група која ќе ги истражува руските олигарси.
– Заедно со нашите европски сојузници да ги најдеме и заплениме нивните јахти, луксузни станови, нивните приватни авиони. Но, исто така и го затвораме нашето небо за руските авиони, рече тој.
– Путин сега е поизолиран од кога и да е од остатокот од светот, бидејќи во борбата против автократијата, демократиите се здружуваат – рече Бајден, најавувајќи забрана на воздушниот простор на САД за руските авиони, како што направија Европската Унија и Канада.
– Најавувам дека ќе им се придружиме на нашите сојузници во затворањето на воздушниот простор на САД за сите руски летови, дополнително изолирајќи ја Русија и додавајќи дополнителен притисок врз нивната економија – рече Бајден.
Изјави дека САД и сојузниците од НАТО ќе ја бранат секој педа од својата територија во Европа.
-Заедно со нашите сојузници обезбедуваме поддршка за Украинците во нивната борба за слобода. Воена, економска и хуманитарна помош. Ќе продолжиме со помагањето на украинскиот народ во нивната одбрана на земјата и да се намали нивното страдање, кажа Бајден.
-Во историјата ќе пишува дека војната на Путин против Украина ја направи Русија послаба, а светот посилен – порача Бајден.
