Група луѓе, граѓани и претставници на повеќе од 40 невладини организации се собраа пред Француската амбасада во главниот град на Азербејџан, Баку, за да ја осудат резолуцијата за признавање на независноста на регионот Нагорно-Карабах, усвоена од Горниот дом на Франција, пренесува азербејџански „Тренд“.
Учесниците на протестот извикуваат слогани „Карабах е Азербејџан!“, „Франција, биди фер!“, „Франција, почитувај го меѓународното право!“, „Франција, излези од ОБСЕ!“
– Додека замижува пред бројните меѓународни злосторства извршени од Ерменија врз Азербејџан, пред теророт и вандализмот врз азербејџански цивили, Франција покажува дволичност и лицемерие пред целиот свет. Резолуцијата на францускиот Сенат насочена кон признавање на т.н. Република Нагорно-Карабах 2 закана за декларацијата да се стави крај на конфликтот во Нагорно-Карабах.
Ние ја осудуваме резолуцијата на францускиот Сенат и бараме нејзино поништување. Бараме прекинување на сите врски со Франција се додека не се поништи резолуцијата. Резолуцијата е голем срам за Франција, која е постојана членка на Советот за безбедност на ОН и копретседавач на Групата Минск на ОБСЕ. Франција мора да се откаже од мандатот на копретседавачот на Групата Минск и од мисијата за медијација – бараат тие.
На 18 ноември, во Президиумот на францускиот Сенат, група сенатори под влијание на ерменската дијаспора презентираа нацрт-резолуција број 145 „за потребата од признавање на Република Нагорно-Карабах“, за која беше дискутирано и беше усвоена на 25 ноември.
Судирот во Нагорно-Карабах првично започна во февруари 1988 година, кога регионот доминиран од Ерменците прогласи отцепување од Советската Социјалистичка Република Азербејџан. Азербејџан изгуби контрола над самопрогласената република и нејзините соседни области во вооружените судири во периодот 1992-1994 година.Од 1992 година, преговорите за мирно решавање на конфликтот течеа со посредство на Групата Минск, ко-претседавана од Русија, Франција и САД.
Оттогаш, непријателствата во регионот избувнуваа повеќе пати, а последниот конфликт започна во септември. Режимот на прекин на огнот беше воведен од 10 ноември, откако лидерите на Русија, Азербејџан и Ерменија усвоија заедничка изјава за прекин на вооружените борби во Нагорно-Карабах на 9 ноември.
Резолуцијата на Франција за Нагорно-Карабах е провокативна
Резолуцијата изгласана во францускиот Сенат со која се бара признавање на Нагорно-Карабах како независна земја е пристрасна и провокативна, соопшти Министерството за надворешни работи на Азербејџан.
– Најпрво, би сакале да нагласиме дека предлог- резолуција за ’потребата за признавање на Република Нагорно-Карабах‘, усвоен од францускиот Сенат, беше директно поставен од страна на група отворено проерменски сенатори – велат од министерството.
Оттаму соопштуваат дека француските Ерменци го користат конфликтот во Нагорно-Карабах за изборни цели, додавајќи: „Прифаќањето на комплетно пристрасна резолуција од Сенатот може само да се смета како провокација“.
Иако резолуцијата усвоена од Сенатот не е правно обврзувачка, Министерството соопшти дека тоа фрла сомнеж на неутралноста на земјата со посредувачка улога.
– Исто така ја поткопува репутацијата на Франција како фер посредник во азербејџанското општество. Наместо да прифаќа пристрасни резолуции, вклучувањето на францускиот Сенат во активности кои служат за мир, стабилност и напредок во регионот би одговарало на интересите на Франција и би довело до одржлив развој во регионот – се додава во соопштението.
Францускиот Сенат вчера усвои резолуција која повикува на признавање на Република Нагорно-Карабах.Односите меѓу двете поранешни советски републики се тензични од 1991 година, кога ерменската војска ги окупира Нагорно-Карабах, меѓународно призната територија на Азербејџан и седум соседни региони. Новите судири избија на 27 септември и завршија по шест недели откако беше постигнато примирје со посредство на Русија.
