Руската државна дума на пленарна седница го усвои законот со кој меѓу другото му дава право на сегашниот лидер на Русија, Владимир Путин, повторно да се кандидира за претседател на државата.

Според една од новите одредби на Уставот на Русија, ограничувањето на бројот на мандати за време на кое едно исто лице може да ја извршува должноста претседател на Русија се однесува на сегашниот лидер на земјата без да се земат предвид неговите претходни претседателски мандати.

Овој закон му овозможува на сегашниот лидер да ја извршува должноста претседател на Русија во уште два мандата, пренесуваат руските агениции.

Автори на иницијативата за претседателски мандати се пратениците Павел Крашеников и Олга Савастијанова, како и член на Советот на федерацијата, Андреј Клишас, кој во ноември минатата година го доставија документот до Државната дума.

Документот предвидува, руски државјанин кој има најмалку 35 години, кој постојано живее во Русија најмалку 25 години и кој никогаш немал државјанство или дозвола за престој во друга земја, да може да биде избран за претседател на земјата.

Покрај тоа, законот предвидува, должноста шеф на Централната изборна комисија да може да ја изврши руски државјанин кој наполнил 30 години.