САД денес ја отфрлија можноста за укинување на санкциите кон Иран, што е предуслов за реализација на заемот од 15 милијарди американски долари за помош на Иран според францускиот предлог.
Претходно денеска висок ирански официјален претставник потврди дека Техеран ќе се врати на своите обврски од нуклеарниот договор ако го добие заемот во износ од 15 милијарди долари.
-Ние јасно ставивме до знаење дека ќе продолжиме да го притискаме Иран и немаме намера да одобриме никакво изземање или да ги укинеме санкциите – рече американскиот претставник за Иран, Брајан Хук.
Тој додаде дека САД ја зголемуваат својата кампања за максимален притисок.
Франција предложи 15 милијарди американски долари кредитни линии до крајот на годината, што би се реализирало доколку Техеран целосно го почитува нуклеарниот договор од 2015 година.
Во 2018 година американскиот претседател Доналд Трамп ги повлече САД од нуклеарниот договор што Иран го потпиша со светските сили. Според тој договор, се укинуваат меѓународните санкции кон Иран во замена за откажување од нуклеарно оружје. Оттогаш, Трамп воведе построги санкции за Иран и забрани секаков извоз на иранска нафта. Извозот беше дозволен во само осум земји, вклучувајќи ги и Кина и Индија, но овие ослободувања беа укинати во мај.
Иранската влада одговори на овие потези делумно откажувајќи се од некои одредби од нуклеарниот договор.
