Најмалку 16 лица го загубија животот во поплавите во источниот дел на Авганистан, додека четворица се повредени, пишува „Асошиејтед Прес“. Повеќето од жртвите се деца, потврдија официјалните лица.
Поплавите погодиле село во Нангархар, изјави портпаролот на гувернерот на покраината. Тој рече дека надлежните испратиле дополнителни екипи на теренот, со цел да им дадат помош на службите за итни случаи кои учествуваат во операцијата за спасување и додаде дека во поплавите биле оштетени околу десетина куќи.
Во источниот дел на Авганистан обилните дождови се чести во текот на летото, што доведува до поплави, како резултат на што секоја година неколку стотици луѓе ги губат своите животи, а голем број завршуваат со повреди.
