Оваа година Европа поскромно ќе ја одбележи 75-годишнината од крајот на Втората светска војна, бидејќи рестриктивните мерки заради коронавирусот се во сила во повеќето земји.
Настаните во кои учествуваат голем број луѓе за одбележување на Денот на победата над фашизмот се откажани, сведени на поскромно ниво или нивната организација е преместена преку интернет, за да се обезбеди усогласеност со мерките за социјално дистанцирање.
Сепак, ќе се одржат некои настани, така што германската канцеларка, Ангела Меркел, и претседателот Франк-Валтер Штајнмаер ќе положат венци на споменикот на жртвите од војната и диктатурата во Берлин, додека на Бранденбуршката порта во Берлин ќе биде проектирано „Ви благодариме“ упатено до сојузничките сили.
Во Париз ќе бидат одржани церемонии затворени за јавноста, за време на кои претседателот Емануел Макрон ќе положи венец на Споменикот на непознатиот војник.
Двоминутно молчење ќе се одржи во Велика Британија, по обраќањето на кралицата Елизабета Втора.
На нацијата ќе ѝ се обрати и британскиот премиер Борис Џонсон, а авионите на Кралските воздухопловни сили ќе летаат над четирите престолнини на Велика Британија.
Чешките политичари ќе пристигнуваат во интервал од 10 минути за да положат венци на споменикот на Витков Рид во Прага.
Во Австрија ќе се одржи виртуелна церемонија во спомен на жртвите од Втората светска војна.
