Одбојкарската федерација на Македонија (ОФМ) го разреши досегашниот селектор на одбојкарксата репрезентација Никола Матијашевиќ и на неговото место го постави неговиот помошник Душко Николиќ. Матијашевиќ доби отказ откако не успеа да ја освои Европската сребрена лига, чиј завршен турнир се играше во Струмица.
– По анализата на настапите и на резултатите во Европската сребрена лига 2021, во којашто македонскиот национален тим не успеа да го освои златниот медал иако финалето го играше на домашен терен, челниците на ОФМ ја прекинаа соработката со Никола Матијашевиќ и решија да му го доверат кормилото на репрезентацијата на неговиот досегашен асистент Душко Николиќ. Извршниот одбор на ОФМ го констатираше придонесот на Матијашевиќ во остварувањето на досегашните цели, но исто така ја истакна потребата од промена пред учеството на Европското првенство во септември во Тампере. Назначувањето на Николиќ ќе значи постојаност во работата на репрезентацијата, но од друга страна ќе овозможи и нов пристап во подготовките за нашето второ учество на континенталните самити – беше објавено на фејсбук-страницата на ОФМ.
