ОДБОЈКА
Најтрофејните екипи се пласираа во финалето на клупското
СП 2024
По досегашните 18 изданија на клупските светски првенства (СП) за одбојкари, актуелниот европски првак Трентино Итас е најуспешен клуб досега, со пет светски титули, втор на таа трофејна табела е шампионот на Јужна Америка, Сада Крузеиро со четири, а токму тие две екипи синоќа играа во финалето на клупскиот Мундијал за годинава, кој се игра во Бразил. На претходните пет изданија на клупските мундијали во одбојка четири пати победија екипи од Италија (Трентино во 2018 година, Кучине Лубе Чивитанова во 2019-та и Сер Сикома Монини Перуџа во 2022 и во 2023 година) и еднаш од Бразил (Сада Крузеиро во 2021 година). Одбојкарските мундијалите за клубови се играат од 1989 година, Трентино има и уште едно второ и три трети места, а Сада Крузеиро и по две втори и трети места на клупските светски првенства. Н.М.
ФУДБАЛ
Тејлор се приклучи на листата со стрелци во најдобрите пет лиги во Англија
Џек Тејлор се приклучи на избраната група фудбалери откако го постигна победничкиот гол на мечот за Ипсвич со Вулверхемптон во англиската фудбалска Премиер-лига, постигнувајќи гол во најдобрите пет лиги во Англија, пишува „Би-би-си“. Тој претходно постигна гол во Втората лига и во Националната лига за Барнет, потоа во Лига 1 и во дивизијата Чемпионшип во дресот на Питерборо, како и во Чемпионшип и во Премиер-лигата играјќи за Ипсвич.
Тејлор станува вториот фудбалер на Ипсвич стрелец во најдобрите пет лиги, заедно со соиграчот од Република Ирска, Семи Смодикс, а другите на оваа голгетерска листа се Гери Хупер, кој го има најдобриот рекорд од сите, бидејќи постигна голови во најдобрите седум дивизии во Англија, потоа Стив Финан, Џими Вилис и Рајан Јејтс. Н.М.
АЛПСКО СКИЈАЊЕ – СВЕТСКИ КУП
Победи за освојувачите на кристални глобуси Одермат и Хитер
Марко Одермат (Швајцарија) ја постигна својата прва победа во велеслалом сезонава на Светскиот куп (СК) во алпско скијање, победувајќи ги ривалите, како и времето во Вал д’Изер (Франција), пишува Интернационалната скијачка федерација (ФИС).
Откако победи на девет од десет трки во велеслалом во минатата сезона, Одермат не ги заврши првите две трки во новата сезона во Зелден и во Бивер Крик. Времето почна да се влошува за време на втората трка, со неверојатно мала видливост, осумте најдобри се мачеа да се пробијат на местата на подиумот и покрај добрите први возења, а и Одермат, исто така, изгуби многу време во своето второ возење, но на крајот остана на врвот, пишува ФИС. Вчера на програмата беше слаломот во Вал д’Изер.
По седум трки сезонава, во генералниот пласман води Хенрик Кристоферсен (Норвешка) со 290 бода, десет повеќе од актуелниот шампион на Светскиот куп во велеслалом, супервелеслалом и во спуст и освојувач на големиот кристален глобус за триумф во генералниот пласман, Одермат, трет е Атле Меграт (Норвешка) со 202…
Во СК за скијачки во Бивер Крик (САД), актуелната освојувачка на малиот кристален глобус за спуст во Светскиот куп, Корнелија Хитер (Австрија), победи на воведната брзинска трка за сезонава, станувајќи првата жена што ја освоила иконската патека во Колорадо, со што ја започна сезонава на Светскиот куп во спуст на ист начин како што ја заврши минатата, на врвот на подиумот, пишува ФИС. Во вкупниот поредок сезонава по шест трки прва е Швајцарката Камил Раст со 287 бода, а потоа се Американката Микаела Шифрин со 245, Хрватката Зринка Љутиќ со 202… Н.М.
СКИЈАЧКИ СКОКОВИ – СВЕТСКИ КУП
Незапирливиот Пашке
Еден ден по сигурната победа во тимскиот натпревар, Пиус Пашке (Германија) повторно се најде на врвот на подиумот, откако 34-годишниот скијач скокач ја оствари својата четврта индивидуална победа сезонава во Светскиот куп во скијачки скокови пред домашна публика во Титизе-Нојштад (Германија). Пашке покажа дека е човекот што треба да се победи сезонава бидејќи дополнително ја зголеми својата предност во генералниот пласман во Светскиот куп, пишува Интернационалната скијачка федерација (ФИС). Синоќа на програмата беше нов индивидуален натпревар во Титизе-Нојштад. Пашке, кој сега има четири победи и по едно второ и трето место сезонава, ја има најдобрата сезона во кариерата и води со 576 бода, а потоа на табелата следуваат Австријците Даниел Чофениг со 440, Јан Херл со 406, Стефан Крафт со 360… Н.М.
