Глобалниот шаховски фестивал на Јудит Полгар привлече илјадници посетители
- Овој меѓународен настан секоја година се стреми да ги претстави разновидноста на шахот, неговите културни вредности и моќта за градење заедница во уникатен формат и амбиент. Освен што го промовира спортот, настанот гради мостови меѓу културите, генерациите и заедниците преку универзалниот јазик на шахот, а годинашниот фестивал уште еднаш докажа дека шахот не е само игра туку искуство што инспирира, поврзува и носи радост за сите возрасти, пишува ФИДЕ. „Сакам да ја инспирирам публиката да излезе од вообичаените граници и да истражи колку можности нуди играта, не само на таблата туку и во животот“, рече Јудит Полгар, основачка и организаторка на Глобалниот шаховски фестивал
Неодамнешниот 11. Глобален шаховски фестивал на Јудит Полгар се одржа со извонреден интерес во Унгарската национална галерија. Прославата на шахот привлече илјадници посетители, кои можеа да изберат од 30 различни програми, во согласност со тројното мото на фестивалот: играј, инспирирај, доживеј. Овој меѓународен настан секоја година се стреми да ги претстави разновидноста на шахот, неговите културни вредности и неговата моќ за градење заедница во уникатен формат и амбиент. Еден од новитетите годинава беше натпреварот Рубиков шах, каде што педесет млади мешани двојки ги тестираа своите вештини. Необичната комбинација на двете игри предизвика голем интерес. Гледајќи го успехот на настанот, најверојатно Рубиковиот шах ќе стане постојана програма на фестивалот во иднина, пишува Светската шаховска федерација (ФИДЕ) на својата интернет-страница.
Комисијата на ФИДЕ за шах за жени беше горда што го поддржа лансирањето на натпреварот Рубиков шах, препознавајќи го неговиот уникатен акцент на тимска работа, креативност и родова еднаквост. Со секој тим составен од по едно девојче и момче, форматот ја одразува мисијата на Комисијата да создава можности каде што талентот не познава пол, а соработката ги зајакнува перформансите. Присуството на претседателката на Комисијата, Анастасија Сорокина, која им додели награди на младите таленти на фестивалот, дополнително ја нагласи посветеноста на ФИДЕ кон иницијативите што ја инспирираат следната генерација и ја промовираат инклузијата во шахот.
На фестивалот беше претставена и специјална изведба на „Стапицата на кралицата“ од чилеанската уметница Југа, аудиовизуелен проект развиен во соработка со Комисијата, славејќи ја моќта и креативноста на жените во шахот.
Благодарение на емитувањето во живо, стотици илјади луѓе ја следеа „Симултанката на заедницата“, во која Јудит Полгар играше истовремено на шест табли против тимови што се придружија од различни делови на светот, вклучувајќи ги интерактивната дигитална платформа за учење „Чесабл“ и „Чесисфоревруан“, заедно со група предводена од поранешниот светски шампион во шаховски бокс.
Меѓу помладата публика, технолошките иновации што ја прикажуваат иднината на шахот беа особено популарни. Меѓу најважните моменти беа првиот шаховски робот со вештачка интелигенција во светот способен да движи вистински фигури и магичната табла „Напред шах“, каде што фигурите се движат самостојно.
– За мене, шахот отсекогаш бил создавање, откривање и храброст. Овие вредности се одразуваат и на мојот фестивал. Сакам да ја инспирирам публиката да излезе од вообичаените граници и да истражи колку можности нуди играта, не само на таблата туку и во животот – рече Јудит Полгар, основачка и организаторка на Глобалниот шаховски фестивал, пишува ФИДЕ.
Во текот на денот публиката на фестивалот уживаше во широк спектар специјални програми. На сцената на „Морган Стенли“ беше претставена „Невидливата шаховска игра“, во која учествуваа Јудит Полгар и нејзиниот поранешен соиграч, олимпискиот освојувач на сребро, ВМ Петер Ач, кои играа на табла со визуелна инсталација. Друг историски белег беше првиот шаховски натпревар во живо помеѓу човек и робот, во кој младиот унгарски шаховски талент Гелерт Карачони се соочи со Сенсробот.
Натпреварувачките шаховски ентузијасти исто така го најдоа своето место на фестивалот: шаховскиот турнир „Играј на плоштадот“ беше вклучен во програмата, додека работилниците „Ајде да шахираме“, предводени од меѓународниот мајстор Армин Јухас, овозможија можности за развој на стратешкото размислување и продлабочување на аналитичките вештини. Посетителите можеа да уживаат и во возбудливи партии против реномирани мајстори на настанот наречен „Предизвик на мајсторот“.
Покрај шахот, музејските едукатори од Унгарската национална галерија го збогатија денот со тематски обиколки со водич, овозможувајќи им на посетителите заедно да го доживеат светот на уметноста и шахот.
Од 2015 година, Глобалниот шаховски фестивал на Јудит Полгар се одржува секоја година, носејќи ги вредностите на шахот до милиони луѓе низ светот. Освен што го промовира спортот, настанот гради мостови меѓу културите, генерациите и заедниците преку универзалниот јазик на шахот. Годинашниот фестивал уште еднаш докажа дека шахот не е само игра туку искуство што инспирира, поврзува и носи радост за сите возрасти, пишува ФИДЕ. Г.И.
