ТЕНИС
Правилата за гранслем-турнирите велат дека играчите имаат 90 секунди од крајот на последниот поен пред промената на страните до моментот кога ќе го почнат првиот поен потоа. На редовните турнири, кои се играат до два добиени сета, играчите добиваат вкупно две минути. „Не ја разбирам таа идеја, да бидам искрена со вас. Друга работа е да се биде ТВ-гледач, но да се биде внатре на стадионот е сосема поинаку. Кога сте внатре на стадионот, луѓето сакаат најдобрите натпревари да траат 10 часа ако е можно. Уживате во драмата, уживате во притисокот, уживате во енергијата и атмосферата“, вели Бартоли
Ефикасноста ќе биде клучен збор на Вимблдон годинава, од брзината на децата што ги собираат топчињата до темпото со кое персоналот на теренот ги развлекува заштитните фолии на теренот и, уште поконтроверзно, времето дадено за тенисерите да се одморат при менувањето по секои два гејма, пишува британски „Гардијан“.
Во време кога телевизиските директори бараат да се забрза спортот, многу играчи се загрижени дека непотребно се брза, особено затоа што, по заедничка согласност, спортот стана повеќе физички од кога било. Правилата за гранслем-турнирите велат дека играчите имаат 90 секунди од крајот на последниот поен пред промената на страните до моментот кога ќе го почнат првиот поен потоа. До пред неколку години тоа беше одмор од 90 секунди, а сега судиите почнуваат одбројување од 60 секунди во моментот кога ќе заврши последната точка пред промената на страните. Потоа имаат 30 секунди за да го почнат следниот поен, пишува „Гардијан“.
Од пандемијата на ковид-19, момчињата и девојчињата што ги собираат топчињата повеќе не им ги подаваат крпите на играчите, кои сами ги собираат од кутиите покрај теренот и често, додека да стигнат на своето место, им остануваат само 45 секунди. Збунувачката работа е што на редовните турнири, кои се играат до два добиени сета, играчите добиваат вкупно две минути, благодарение на ТВ, која сака одредено време за прикажување повеќе реклами.
– Малку е чудно затоа што очигледно имате ТВ-промени на турнејата. Всушност, тоа го побарав на Ролан Гарос минатиот месец, бидејќи не разбрав зошто во потешкиот натпревар, ефективно, добивате помалку време. Тоа е всушност малку чудно. Претпоставувам дека е за ТВ-цели – рече британскиот играч Ден Еванс викендов, пренесе „Гардијан“.
Прашањето е зошто паузите за промена се пократки на гранслем-турнирите, пишува „Гардијан“. Марион Бартоли, која го освои гранслем-турнирот Вимблдон пред 10 години, не гледа зошто играта воопшто треба да се забрза.
– Не ја разбирам таа идеја, да бидам искрена со вас. Друга работа е да се биде ТВ-гледач, но да се биде внатре во стадионот е сосема поинаку. Кога сте внатре во стадионот, луѓето сакаат најдобрите натпревари да траат 10 часа ако е можно. Уживате во драмата, уживате во притисокот, уживате во енергијата и атмосферата. Не велам да има три минути за промена на страните, но… нека ја земат крпата, нека седнат и кога двајцата ќе седнат, ќе ги почнете 60-те секунди. Ако еден играч очигледно намерно оди полека до своето столче, тогаш ќе му дадете предупредување. Барем тогаш имаат доволно време да се соберат и потоа да бидат подготвени за следните два гејма – рече таа.
