ФОРМУЛА 1
Oтскокнувањето е феномен што се врати во Формула 1 по 40 години сезонава, како резултат на промените на правилата насочени кон тоа да има поблиско тркање
Светската автомобилска федерација (ФИА), управното тело на Формула 1, одолеа на притисокот од тимовите да се откаже од потезите за да го ограничи „отскокнувањето“ на болидите. „Одговорност и привилегија на ФИА е да интервенира за безбедносни прашања“, пишува во соопштението на ФИА, пренесе „Би-би-си“.
Мерките ќе стапат во сила за трката во Белгија, на 28 август. Водечкото тело треба да воведе метрика што ќе го одреди максималниот износ на отскокнување што ќе биде дозволувано. Тимовите ќе мора да направат промени во поставувањето ако нивниот болид ја надмине границата и може да се соочат со дисквалификација ако тоа се случи за време на квалификациите или на трката. Дополнително, ФИА презеде мерки за ограничување на флексибилноста на подовите на болидите откако во своите мерења за скокањето на болидите во последните трки дојде до заклучок дека некои тимови нашле начини да ги свиткаат своите подови над очекуваните граници, пишува „Би-би-си“.
Отскокнувањето е феномен што се врати во Формула 1 по 40 години сезонава, како резултат на промените на правилата насочени кон тоа да има поблиско тркање. Тие го променија начинот на работа на аеродинамиката на болидите и повторно воведоа нешто што се нарекува ефект на привлекување, со што се создава надолна сила со забрзување на протокот на воздух под подовите на болидите. Ова доведе до два различни, но поврзани проблеми. Кога протокот на воздух ќе се наруши, автомобилот се крева додека се губи надолната сила, а потоа се намалува додека протокот на воздух се стабилизира, пред повторно да заглави, што доведува до високофреквентно вертикално осцилирање и отскокнување. Цврстината на поставките на суспензијата што се потребни за ефикасно функционирање на теренот доведува до тоа автомобилот да покажува лоши својства на возење преку нерамнините.
Возачите се загрижени за безбедносните импликации на двата феномена и на состанокот на трката во Азербејџан минатиот месец колективно побараа од ФИА да интервенира. ФИА вели дека болидите „ќе мора да останат под пропишаната вредност за време на трките“ и се додава: „Ф1-тимовите ќе можат да ја користат метриката веќе од претстојната трка во Франција, за да ги дознаат нејзините целосни импликации врз поставувањето на нивните болиди“. Трката во Франција е на 24 јули.
