Најдобриот македонски атлетичар Дарио Ивановски и српската атлетичарка Теодора Симовиќ победија на десет километарската трка која се одржа во склоп на атлетската манифестација „Охрид трчаТ“.
Ивановски десеткилометарската делница ја помина за 31 минута и 55 секунди и стигна до втората победа на „Охрид трчаТ“. Ивановски победи во првото издание одржано 2017 година. Симовиќ која годинава дебитираше и победи десетте километри ги истрча за 37 минути и 56 секунди.
– На „Охрид трчаТ“ учеството го имаа пријавено 1 585 натпреварувачи. Настанот беше емитуван во живо, а на учесниците не им попречи ниту дождот кој само беше уште еден декор во ново фантастично издание на оваа атлетска манифестација – велат организаторите на настанот.
Трета година по ред втората позиција во машка конкуренција ја зазеде Милош Ранчиќ кој имаше време (34:17), додека третопласиран финишираше Муџахит Мислимоски со (34:41). Во женска конкуренција двократната шампионка Адријана Поп Арсова се закити со сребреното одличје со време (39:10), а бронзата и припадна на Бугарката Билсерин Сулејман (40:41).
Во рекреативната трка на 5 километри најбрзи беа Кристијан Стојани со време (18:33) односно Елена Даниловска со време (24:17). Во машка конкуренција на тим билдинг трките на 10 и 5 километри победници се Делта односно Ласовски Дентал, додека во женска конкуренција на 10 километри најбрзо беа членовите од Најк Ран клуб, а на пет први финишираше екипата од Костал.
