Вкупниот награден фонд за натпреварувањето беше над две милијарди евра, кој се зголемува за 25 отсто за сезонава, во новиот и проширен формат со повеќе тимови и повеќе натпревари
ФУДБАЛ – ИЗВЕШТАЈ НА УЕФА ЗА МИНАТАТА СЕЗОНА
Освојувачот на Лигата на шампионите (ЛШ) во 2024 година, Реал Мадрид, минатата сезона беше на врвот и на листата со парични награди, со добивање речиси 139 милиони евра, соопшти Европската фудбалска унија (УЕФА), пренесе агенцијата „Асошиејтед прес“ (АП).
Паричната награда на Реал Мадрид дојде од вкупниот награден фонд за натпреварувањето од повеќе од две милијарди евра, кој се зголемува за 25 отсто за сезонава, во новиот и проширен формат со повеќе тимови и повеќе натпревари.
Шпанскиот фудбалски клуб доби вкупно 138,795 милиони евра. Реал Мадрид заработи повеќе од 36 милиони евра според коефициентот, а околу 14 милиони евра како дел од приходот од договорите за правата за ТВ-пренос, пишува АП.
На второто место на оваа листа на Европската фудбалска унија е Пари сен Жермен со 122,4 милиони, а потоа се финалистот Борусија Дортмунд со повеќе од 122,4 милиони евра, Баерн заработи 120,4 милиони…, а од другите клубови Манчестер сити 110,5 милиони евра, Барселона 98 милиони, Манчестер јунајтед околу 61 милион евра, пишува АП.
Ланскиот победник во Лига Европа, Аталанта, доби речиси 34 милиони евра, финалистот Баер 41,2 милион евра, Ливерпул, кој играше во четврт-финалето, заработи 26,8 милиони евра…, пишува АП.
Европската фудбалска унија, исто така, ѝ плати 25 милиони евра на Европската клупска асоцијација, која претставува стотици клубови. Наградите се детализирани во финансискиот извештај на Европската фудбалска унија објавен за време на нејзиниот годишен состанок што се одржува во Белград, пишува АП. Н.М.
